فنون الثلاثاء، 21 أكتوبر 2025 01:20 مـ بتوقيت القاهرة

“هو اختارني أنا مش الأضواء”.. أمينة خليل تتحدث عن زواجها من أحمد زعتر وحلم الأمومة

في أول ظهور تلفزيوني بعد زفافها، فتحت الفنانة أمينة خليل قلبها لجمهورها وتحدثت بصراحة عن تفاصيل حياتها الزوجية مع المصور أحمد زعتر، خلال لقائها في برنامج "الصورة" مع الإعلامية لميس الحديدي على قناة النهار.

وقالت أمينة بابتسامة مليئة بالحب:"عدّى 4 شهور على الجواز، والحمد لله الأمور ماشية كويس، بس لسه بنحاول نستقر بعد فترة مليانة مهرجانات وأحداث".

وأضافت أن الزواج بالنسبة لها ليس مجرد ارتباط، بل بداية مرحلة أكثر هدوءًا واستقرارًا بعد سنوات من الانشغال الفني:"أول ما نخلص موسم المهرجانات، ناويين ناخد وقت لنفسنا ونعيش في هدوء شوية".

من زمالة عمل إلى قصة حب

روت أمينة خليل تفاصيل أول لقاء جمعها بزوجها قائلة:"اشتغلنا مع بعض زمان في شغل، وبعدها بقت بينا صداقة طويلة. ومع الوقت اتكلمنا أكتر، واتقربنا، ولما مابقاش في صراع بين القلب والعقل، كنت عارفة إن دي العلاقة الصح".

وأكدت أن التجارب السابقة علمتها أن التفاهم والأمان النفسي أهم من المظاهر، مضيفة:"الواحد لما بيكبر بيدوّر على اللي يريّحه، على الصديق قبل الشريك... وده اللي لقيته في أحمد".

زفاف مصري ويوناني: "أحمد ما اختارش الأضواء.. اختارني أنا"

عن سبب إقامتها حفلين للزفاف، قالت أمينة:"كنت عايزة أفرّح أهلي وصحابي في مصر، وفي نفس الوقت أعمل احتفال خاص في اليونان بعيد عن الكاميرات احترامًا لخصوصية أحمد. هو ما اختارش الشهرة اللي حواليّ، هو اختارني أنا".

وتابعت مازحة:"هو مش بيحب الأضواء خالص، بس بيتعامل معاها بصدر رحب علشاني، وده بالنسبالي دعم كبير جدًا".

الدعم المتبادل: "هو فاهم ضغوط شغلي وبيشجعني دايمًا"

أشادت أمينة بتفاهم زوجها مع طبيعة عملها في الوسط الفني، موضحة أنه لا يشعر بالغيرة من الأضواء المحيطة بها، بل يدعمها في كل خطوة:"أحمد فاهم شغلي جدًا، وبيقدر المجهود اللي وراه. هو شخص متفاهم، هادي، وبيحب يشوفني ناجحة".

وأضافت ضاحكة:"أي صورة بنزلها على إنستجرام لازم آخد موافقته الأول!"

تحدثت أمينة عن بداياتها الفنية قائلة:"أول مرة أدخل لوكيشن تصوير في مصر كانت مع المخرج الكبير يوسف شاهين في فيلم الإسكندرية نيويورك. كنت كومبارس صغيرة عندي 15 سنة، ومبهورة بكل حاجة حواليّ".

وتابعت:"كان لما شاهين يدخل اللوكيشن الكل يسكت... اللحظة دي حفرت في قلبي معنى الفن الحقيقي".

كشفت أمينة عن التأثير العميق الذي تركه فيها مسلسل لام شمسية:"الدور أثر فيّ جدًا. بعد آخر يوم تصوير حسّيت إني مش أنا، وقعدت شهر بحاول أرجع لنفسي وأفرّغ الطاقة اللي شلتها من الشخصية".

وأضافت بابتسامة خفيفة:"واضح إن ربنا كان كاتب لي بعدها فرحة كبيرة... الجواز جه في توقيت جميل".

خطوة جديدة: "مش هشارك في رمضان 2026 وهركّز على السينما"

أعلنت أمينة خليل عن قرارها الابتعاد مؤقتًا عن دراما رمضان 2026، مؤكدة أنها ترغب في التركيز على السينما:"مش هشتغل في الموسم الجاي علشان أتفرغ للسينما، عندي تلاتة أفلام بجهز لهم وعايزة أطلع فيهم بأفضل شكل".

حلم الأمومة: "نفسي أكون أم وأعيش حياة متوازنة"

اختتمت أمينة حديثها بكلمات صادقة تعكس نضجها الإنساني:"الزواج كان حلم، بس الأمومة هي الحلم الأكبر. نفسي أكون أم وأعيش حياة هادية، ولما ربنا يرزقني طفل، تركيزي كله هيبقى معاه".

وأضافت بابتسامة هادئة:"كل تأخيرة فيها خيرة... وربنا دايمًا بيكتب الخير في التوقيت الصح".