شهيرة تكشف أسباب ابتعادها عن الفن وعلاقتها بـ محمود ياسين
كشفت الفنانة شهيرة أسرار جديدة من حياتها الشخصية وسبب اختفاءها عن الفن في فترة تألقها، وذلك خلال حلولها ضيفة في برنامج “مساء دي إم سي” مع الإعلامية إيمان الحصري.
شهيرة: بحب مهنتي بس بقيت مودية أوي
وقالت شهيرة: "كان عندي ظروف، محمود وكدا، وبعد كدا مبقاش ليا مزاج.. أنا بحب مهنتي وبعتز بيها، وأصلا دي دراستي أنا مليش شغلانة تانية، وأنا أصبحت مودية أوي، ومش في أي وقت حتى أحب أعمل انترفيو، ومش في أي وقت أقدر أرجع، وإذا رجعت هيبقى فيه عندي تحفظات كتير، وزمان غير دلوقتي”.
وأضافت : "أنا نفسي أرجع بس مش سهل، من ناحية أني قلاقي موضوع مناسب، بعد الفترة الطويلة أوي دي أنا هقدم أيه، وأنا بقالي سنين كتيرة أوي بعيد".
شهيرة: سبت الفن عشان كنت محتاجة أقرب من ربنا أكتر
وأوضحت:"الفترة اللي أنا سيبت فيها الفن دي كانت أهم مرحلة عندي، كانت فترة التألق، بس يمكن جيت في فترة كنت محتاجة أقرب من ربنا أكتر، عشان أنا بحب شغلي أوي وبياخد كل وقتي وكل تفكيري، فكان بيتهيألي أن دا واخدني من أني أتقرب من ربنا أكتر، حسيت أني مش عاملة الواجب اللي يرضي ربنا".
وتابعت:"وأنا مش ندمانة، أنا قربت من ربنا أكتر، وعرفت حاجات كتيرة أوي أنا مكنتش واخدة بالي منها، حتى في العلاقات الإنسانية، مش مسألة بحفظ قرآن، لأن زي ما كلنا عارفين، الدين معاملة".
شهيرة تتحدث عن علاقتها بمحمود ياسين
واتجه الحديث عن علاقتها بزوجها النجم الراحل محمود ياسين، حيث قالت: "احنا كنا متفاهمين، وكانت علاقة بينا زي أي زواج بس أنا كنت دايما مفضلة أن هو يتقدم، وكنت شايفاه بيصعد بسرعة الصاروخ، وأنا وراه وجانبه، عشان بهتم بالبيت جدا وبالولاد، فمينفعش هو يكون مشغول وأنا مشغولة، ونسيب البيت ونسيب الأولاد".
وواصلت: "فكانت العلاقة بينا فيها تفاهم مبني أصلا على الحب، يعني احنا أصلا اتجوزنا عن قصة حب، وكان لا يمكن يقول أنا هاخد شهيرة في الدور دا.. مستحيل، لازم المخرج هو اللي يقول أنا عايز شهيرة، غير كدا لا، ومفيش حد بينجح حد".
واختتمت حديثها: "ساعات كان فيه أدوار معينة مش بيحب أني أعملها، أكتشفت في فيلم صعود إلى الهاوية، والمخرج كان عايزيني في الفيلم، راح محمود قاله لا دي لسه بتبتدي هتعمل جاسوسة الناس هتكرهها، ولما عرفت قولتله طب أسألني، أنت ليه تقول من نفسك".
