كندة علوش تعلن إصابتها بسرطان الثدي و تكشف معاناتها في رحلة العلاج

تحدثت الفنانة كندة علوش عن تفاصيل اللحظات الأولى التي اكتشفت فيها إصابتها بسرطان الثدي ومعاناتها في رحلة العلاج .

وقالت كندة علوش في بودكاست مع الإعلامية منى الشاذلي عبر قناتها على يوتيوب: بدأت احس في الم في مشكلة اثناء الرضاعة، وروحت عملت فحوصات قالولي التهاب بس شهر اتنين الأعراض اللي عندي مش بتروح .. في ناس في الحياة موسوسه انا مشكلتي اني العكس تماما فالعكس دي خلاني مش بخاف مش بقلق .. و مسلمه امري لله طول الوقت.

وتابعت: بس لما عدا 4 او 5 شهور والمشكلة مش بتتحل وعمرو عمال يقولي نعمل فحص و مكنتش شايفه ليه لزمه بس قولت اشوف لما روحت للدكتورة .. من أول ما شافتني قالتلي في حاجه مش مظبوطه فقالتلي عايزه اخد عينه، والمفروض الموضوع بياخد من 3 لـ 5 أيام، فلقيت تليفون بيجيلي يقولي استاذه كنده التحاليل طلعت قالي هي مش ليكي صح .. قولتله لأ ليا .. قالي هي والله النتيجه مش كويسة .. قولتله يعني ايه .. قالي يعني في اكتر من ورم خبيث .

وأضافت: انا عندي هيستوري في العيلة، جدتي توفت كانـسـر وخالتي كذلك في سن صغير برضه وخالي، فعندي في الهيستوري وبرضه سبحان الله كنت مستبعداه .

وواصلت: عمرو كان مرعوب اكتر مني فخدني لدكتور .. وقالي اني محتاج اخد العلاج المتعارف عليه لحد مرحله معينه اللي جوايا ده يصغر وقتها اشيله بالعملية الجراحية وبعد كده بنعمل الاجراءات التانية.

وعن أول جلسة كيماوي، قالت: بدأت أول جلسة كيماوي بعدها بأسبوع، بعد عيد ميلاد ابني، الرحلة الآن عندما اتذكرها افتكرها بذكريات لطيفة، كنت بروح أنا وعمرو وكنت بقرأ قرآن، كنت عايزة أخوض التجربة لوحدي، وكنت بطلب من عمرو مايجيش بس هو مكنش بيرضى، كان بييجي يقرأ الاسكربت وأنا بنام أو اقرأ قرآن أو اتأمل، ورفضت الحديث عن مرضي لأي شخص لأني مكنتش عايزة اتعامل كمريضة، مش إنكار ولو عشت في المود دا هتعب.

واستكملت: أنا اخترت أكون طبيعية وعايشة حياتي بشكل طبيعي، وعمر أطفالي سنتين و5 سنين، مايدنيش رفاهية إني أتدلع أو اعيا، هما عايزين يلعبوا وكان لازم اعمل معهم كدة، وكنت بتعب، وكنا في المصيف، كنت برجع 3 ساعات اخد الجلسة، وارجع 4 ساعات عشان اوصل هناك، وجسمي كله تعبان، والأطفال عايزين يلعبوا، وكنت بلعب معهم وأنيمهم وأكلهم، التفاصيل دي ساعدتني اني اعدي الرحلة بسلاسة وبساطة وإيجابية.

واتمت: ربنا سبحانه وتعالى نزل عليا سكينه ورضا وطمأنينه مش طبيعيه .. احنا بنتكلم انهارده بعد سنة وشهر من اكتشافي للمرض وانا لسه بتلقى لحد انهارده باخد الجزء المتبقي من العلاج الكيماوي ولسه فيما بعد العملية وبعدين ارجع تاني للكيماوي ثم الاشعاعي والهيرموني .. بس الحمدلله ربنا بيمشيها بردا وسلاما علينا.