رضوى الشربيني تدخل في نوبة بكاء أثناء الحديث عن مرض والدتها

دخلت الإعلامية رضوى الشربيني في نوبة من البكاء أثناء حديثها عن تفاصيل مرض والدتها الراحلة وأيامها الأخيرة.

وقالت رضوى الشربيني خلال لقائها اليوم ببرنامج أنا والقناة مع الإعلامية منى عبد الوهاب: صحيت من النوم في التوقيت اللي كان هناك بلاد قفلت فيه بسبب الجائحة، وأنا كنت أول واحدة أصيبت بكورونا وماما أخدت العدوى مني، وعزلت نفسي والبيت كله طلع سلبي واتطمنت شوية، وسمعت بنتي الكبيرة بتكح، كلمت صحبتي أني لازم أطلعهم من البيت.

وأضافت: سمعت صوت ماما بتكح وكلمت حد من وزارة الصحة وبالفعل جاء أفراد من الوزارة وعملوا الاختبار وطلع البيت كله إيجابي، واليوم ده قررت أنه حتى التعب مينفعش أحس بيه، لأن مفيش حد يمرض كل دول.

وتابعت: بعد 24 ساعة بنشوف الأكسجين بتاع ماما لقيناه قليل، وقلبت الدنيا عقبال ما لقيت لها مكان في المستشفى وطلبنا الإسعاف ووديناها المستشفى أنا وأخويا، وعمري ما هنسى الكلمة اللي قالتها لي وقتها، قالت لي لو هتدخليني المستشفى أنا هموت هنا.

واستكملت : في يوم الدكتور اتصل بيا وقالي تعالي شوفي مامتك عشان هي هتتحسن ونفسيتها هتبقى احسن..وأنا كنت عند دكتور في مستشقى تانية وخدت بعضي و رحتلها وكانت بترد عليا لما بكلمها ولما محمد جه ماما فاقت وقالتلي خلو بالكو على بعض وبعدين كل الأجهزة بتزمر

ووصلت: وجه الدكتور قال ده طبيعي وقالي مش عايز حد فر الزيارة عشان مامتك.. ويوم الوفاة كنت ريحلها في الطريق لاقيت الاسستنت بتتصل بيا قبل مااوصل .. لاقيتهم بيقولولي البقاء لله مدام هالة اتوفت لكن الحكاية موقفتش لحد هنا أحنا كنا واقفين في الاوضة اللي فيها ثلاجة الموتى والدكتور بيسألني أنتي لسه عندك كورونا قولتله أه قالي يبقى أنتي اللي هتغسلي مامتك.

وتابعت:رجعت بيتي لاقيت الجيران في البيت.. وكل الوشوش اللي لاقتها جوه مش خايفة على نفسها خايفة عليا لكن في نفس الوقت صرخت عشان خايفه عليهم وطلبت منهم كلهم يمشوا

واختتمت: تاني يوم روحت المستشفى غسلت أمي وودعتها وبعد ماخرجت عرفت أن أني كورونا سلبي فاربنا كان رايد أني أنا اللي أغسلها.