مشروع ”بشاير من أجل مستقبل أفضل”يقرض 1137 إمرأة معيلة
بهدف تمكين المرأة إقتصاديًا تستمر "جمعية نهوض وتنمية المرأة" بالشراكة مع "جهاز تنمية المشروعات المتوسطة والصغيرة ومتناهية" في تنفيذ مشروع "بشاير من أجل مستقبل أفضل"، والذي بدأ في أغسطس 2018 ويستمر على مدار 5 سنوات.
صرف قروض لـ 1137 إمراة معيلة
يستهدف المشروع 800 إمرأة معيلة في مناطق مصر القديمة ودار السلام ومنشية ناصر والمناطق التي حولها بمحافظة القاهرة، والتي تصل إلى أكثر من 15 منطقة عشوائية مهمشة، ومنذ بداية المشروع وحتى مايو 2019 ، تم صرف قروض صغيرة لعدد ألف و مائة و37 امرأة معيلة ، بقيمة 3 مليون و 829 ألف جنيه فقط لا غير، بهدف تحسين مستواهن الاقتصادي وتوفير دخل مناسب لهن، عن طريق منحهن قروض متناهية الصغر، وتتراوح شرائح القرض من 2500 جنيه وحتى 10.000 جنيه.
مشروعات متنوعة
ولتحقيق الهدف العام من المشروع، فقد تنوعت المشروعات التي يعمل عليها المشروع حيث تضمنت مشروعات تجارية، خدمية، صناعية، زراعية، وحيوانية، لتوفير فرص عمل وزيادة الدخل مما يحقق الهدف العام من المشروع .
شهادة احدى المستفيدات :
بالصبر قدرت أواجه مشاكلي.. وبالقرض قدرت أصرف على ولادي وأجوزهم
ع.ب، سيدة في العقد الخامس من العمر، تقول: أنا مطلقة وعندي بنت و3 صبيان وكلهم دلوقتي متجوزين وعندهم أطفال، بمرور الوقت بدأت أحس بالمعاناة إني لوحدي ومحتاجة أصرف على نفسي وعلى 4 أطفال في سن المدرسة، وقتها بدأت أفكر أعمل إيه يناسب ظروفي وظروف أطفالي، بدأت أبيع حاجات بسيطة من بسكوتات وغيرها للأطفال من خلال كشك صغير أدام بيت أهلي اللي أنا عايشه فيه، ولإن المصاريف كتيرة علينا ومكانش حد بيساعدنا، حتى والدهم بعد الطلاق محاولش يساعدنا، اضطر ولادي الاتنين الولاد يسيبوا مدارسهم ويشتغلوا شغلانات بسيطة علشان يساعدوني وعلى الأقل يتحملوا مصاريفهم.
بعد فترة لقيت إن الفلوس مش مكفية، ومحتاجة أكبر شغلي علشان أزود دخلي وأقدر أغطي مصاريف ولادي، بس مكنتش عارفه أعمل ايه؟ وبالصدفه كنت قاعدة ببيع كعادتي أدام بيت أهلي، لقيت موظفات من جمعية نهوض وتنمية المرأة، لما عرفوا ظروفي الصعبة عدوا عليا واتكلموا معايا إن ممكن ألاقي حل لمشكلتي وإن ممكن أكبر مشروعي من خلال قرض بتديه الجمعية، وشرحولي كل تفاصيل القرض وطرق سداده، وبعد ما فهمت منهم كل حاجه حسيت إن ده الحل الوحيد والمناسب ليا ولظروفي.
وبسرعه روحت مقر فرع الجمعية القريب من منطقتي ولقيتهم رحبوا بيا وبدأنا نعمل خطوات القرض وفعلًا استلمت أول قرض ليا اللي كان من 15 سنة تقريبا وكان قيمته 500 جنيه، وفي الجمعية علموني أعمل ميزانية ووجهوني علشان مشروعي ينجح.
وبسرعه أول ما أخدت فلوس القرض أجرت محل صغير قريب مني واشتريت بضاعة، وبدأت أبيع، ومن الربح آخد جزء لمصاريف البيت والجزء التاني أشتري بضاعة أزود بيها في المحل، وكنت لما أسدد القرض آخد القرض الأكبر، وأخيراً أخدت قرض ب5000 التابع لمشروع بشاير من أجل مستقبل أفضل زودت بيه البضاعة في المحل، ومكملة بيع وشرا ، وولادي دلوقتي بقوا فخورين بيا، وماشيين وسط الناس ووسط أصحابهم رافعين راسهم إن والدتهم كافحت علشانهم، وربتهم أحسن تربية.
