بعد استئصال الرحم.. حورية فرغلي تكشف تطورات حالتها الصحية وتوجه الشكر لعدد من الفنانين

كشفت الفنانة حورية فرغلي عن آخر تطورات حالتها الصحية بعد خضوعها لـ عملية استئصال الرحم خلال الأيام الماضية.

وقالت حورية خلال لقاء عبر شاشة قنوات art:أحب أطمنكم أنا رجعت من المستشفى ورجعت البيت وبقيت كويسة الحمدلله وشكرا لكل اللي سألوا عليا، شكرا لـ نجوم الزمن الجميل،صفاء أبو السعود كان نفسي أكون ضيفة في حلقاتك وصفية العمري وأشرف زكي وإلهام شاهين ومحمد رمضان ناس كتير أوي سألت عليه.

وتابعت : أنا اتولدت برة وعيشت برة فطول عمري كنت محتاجة للحنان والحنية وده حسيته أخر أسبوع اما جالي ورم في الرحم، وأنا مش هيبقى عندي اي أطفال خلاص بس ولاد اخواتي هما هما ولادي وأي طفل هشوفه هعتبره ابني.

وأضافت: "الحاجة الغربية أن تليفوني من امبارح مبطلش رن من صحفيين وفنانين وناس مش بيشتغلوا في الفن خالص وكمية الدعاء والضحك والحب أنا مكنتش مصدقة نفسي، حصل من الغريب ومحصلش من القريب ودي حاجة مأثرة فيا أوي".

واستكملت: "في يجي 40 شخص أنا معرفهومش ساكنين في العمارات اللي حواليا جابولي شيكولاتة وكيك وفضلنا نتكلم ونضحك، الحكاية دي أدتني قوة وطاقة أني لازم أقف على رجلي وأرجع تاني، أنا الحمد لله بقيت زي الفل ومش هتسمعوا عن عمليات ولا حوادث وهحاول أنقي قصص بتحبوها وأدوار تكون مميزة، هو في عملين مع أستاذ خالد الحجر وأكرم فريد إن شاء الله هندخلهم قريب".

واختتمت لقائها، قائلة: "أنا أسعد إنسانة في الدنيا لأني عمري ما تخيلت أن في ناس متعرفنيش بتحبني، وبقول شكرا لكل حد دعالي وزعل عشاني وجالي وجاب لي ورد، أنا فخورة أني مصرية لأن معتقدتش في بلد تانية عملت كده مع فنانة مرت بظروف صعبة والناس كلها وقفت جنبها".