حازم إيهاب: ”اتخانت مرتين ودخلت المستشفى بسبب الحب.. وابني توفي بعد 13 يومًا من ولادته”

كشف الفنان الشاب حازم إيهاب خلال ظهوره في بودكاست "فايق ورايق" مع الإعلامي إبراهيم فايق، عن محطات صادمة ومؤثرة في حياته الشخصية، بدءًا من الخيانة العاطفية وحتى فقدان نجله بعد أيام قليلة من ولادته.

خيانات وانكسارات.. وانهيار صحي بسبب الحب

روى حازم إيهاب تفاصيل تجربته العاطفية التي مر بها قبل زواجه، قائلًا:"اتخانت مرتين، وفي المرة التالتة اتسابت.. الموقف كان صعب لدرجة إني دخلت المستشفى واتشخصت بمشكلة مزمنة في القلب، واتضح إن عندي (عدم انتظام في ضربات القلب)".

وأضاف:"وقتها كنت في بداية حياتي، شكلي اتغير وبقيت مطلوب، بس رغم كده اتعرضت للغدر.. أول خيانة كنت مش متحكم في أعصابي، كنت صغير جدًا ومش فاهم اللي بيحصل".

منة.. الضوء وسط ظلام التجارب

استكمل حازم قصته قائلًا:"بعد كل ده، ظهرت مراتي منة.. من وسط السواد والظلمة. اتجوزتها وأنا عندي 24 سنة، وكنت مش معايا حاجة. قولت لها من البداية: معنديش فلوس، بس عايز أقابل والدتك".

وبالفعل، خلال عشرة أيام فقط، التقى بعائلة "منة" وقرر الارتباط بها بشكل جاد.

وأكد أن منة كانت مصدرًا للطمأنينة والأمل في حياته، وكانت سببًا في خروجه من حالته النفسية الصعبة.

قصة يونس.. وجع 13 يومًا لا يُنسى

أكثر اللحظات ألمًا في حديث حازم إيهاب كانت عند حديثه عن ابنه "يونس"، الذي توفي بعد 13 يومًا فقط من ولادته، حيث قال:"بعد 4 شهور من الجواز، مراتي كانت حامل. في الشهر الخامس اكتشفنا مشكلة في القلب.. واحدة من غرف القلب مش شغالة. وقتها كنت بحاول أطمنها وأتحمل المسؤولية لوحدي".

وتابع: "يونس" خضع لعملية بعد 6 ساعات فقط من الولادة في مستشفى مجدي يعقوب، لكن حالته كانت حرجة منذ البداية. حاول الأطباء، لكن عضلة القلب لم تكن قوية بما يكفي.

وأضاف: "في اليوم الـ13 دخل غرفة العمليات للمرة التانية.. وبعد 4 ساعات الدكتور خرج وقالي الجملة اللي عمري ما هنساها: إحنا حاولنا، لكن جسمه كان بينهار".

رغم الصدمة، أكد حازم إيهاب أن الإيمان بالله ساعده على تجاوز محنته: "الحمد لله، عمرنا ما زعلنا من اللي حصل. أنا واثق إنه شفيع لينا في الجنة. الحكاية خلصت بسرعة، وده من رحمة ربنا، في ناس بتعيش الألم ده شهور وسنين".