بعد اعتزاله المفاجئ.. تامر حسني يشيد بإنجازات محمد سامي ويدعمه برسالة مؤثرة
أثار إعلان المخرج محمد سامي اعتزاله الإخراج التلفزيوني جدلًا واسعًا في الوسط الفني، حيث أكّد أن مسلسلي "إش إش" و"سيد الناس" سيكونان آخر أعماله في هذا المجال.
وبينما انقسمت ردود الفعل بين مؤيد ومتفاجئ، كان النجم تامر حسني أول الداعمين له، برسالة مؤثرة ومليئة بالتشجيع.
تامر حسني: نجاحك سبب الانتقادات
و في تعليق خاص عبر حساباته الرسمية، عبّر تامر حسني عن إعجابه الكبير بمسيرة محمد سامي، مشيرًا إلى أن النجاح الكبير يأتي دائمًا مع ضغوط وانتقادات، لكنه يبقى شاهدًا على موهبة لا جدال فيها.
وقال تامر في رسالته:أوعى تكون عايز تبعد عشان أي إحباط جايز يكون فعلًا في بعض المشاهد اللي الناس انتقدتها وأنا شخصيًا استغربتها شويه وقولت جوايا أنك مش محتاج تعملها أصلًا لأن عندك الحقيقي والأهم بس على رأيك الفنون جنون أحيانًا فكره مجنونه تنال الإعجاب وفكره لأ.
وأضاف : بس ده ميخليناش ننسى إنها بعض مشاهد مش بعض أعمال لأنك بالفعل المخرج الوحيد في تاريخ مصر اللي مفشلش ولا مره ويمكن الحظ محالفكش أوي في عمل ولا 2 على مدار 14 سنة ودي حاجه مينفعش الجمهور ينساهالك» مضيفا :«أنت قدمت مسلسل آدم اللي جمع كل المصريين وكل الوطن العربي يتفرجوا عليه زي ماتشات الكوره بسبب أنه أتكلم عن قضية تخص كل الوطن وكان بدايه لصوره جديده أول مره كانت بتتقدم في مصر.
وتابع : وبعدها سبق الإصرار وحكاية حياه اللي كانوا نقله كبيره في ديكورات الدراما المصرية وبعدين الأسطورة والبرنس وجعفر العمدة اللي حققوا نجاحات ساحقه وكانوا أعلى نسبة مشاهدات في الدراما بشكل عام وبعدهم نعمة الأڤوكاتو وإش إش وسيد الناس اللي برضو كل واحد فيهم يا أعلى مشاهدة يا تاني أعلى مشاهدة.
واستكمل :هزعل منك لو هتمشي محبط وأنت أنجح حد … الشجرة الخضراء الجميله ساعات بيطلعلها ورق أصفر بسيط عادي بيتقص وبتفضل شجرة كبيرة وجميلة وده التطوير الطبيعي للبني آدم واللي بيمر بيه أي ناجح بيطور وعنده شخصية.
وأوضح: بدليل مسلسلاتك بيتقال عليها مسلسلات محمد سامي وتركيز الناس معاك دليل على حبهم لأعمالك ورغم إن بعضهم بينتقدوها بس متابعينها حرف حرف ونقدهم ليك بيبقى على قد حجمك وهي دي ضريبة الناجحين الكبار … سافر وكمل حلمك وأنت منتصر بتاريخك وأوعى تُحبط.
وواصل :أنا عارف إن محمد سامي اللي أكتشفته أنا وقدمته للصناعه وهو عنده 27 سنة لا يمكن هيتهز ممكن يزعل يومين ويراجع نفسه في مشاهد أنا مبسوط منك أنك بمنتهى الشجاعة الأدبية أعتذرت على تقديمها خد راحه شوية وإرجع أقوى من الأول وأنا واثق من اللي هتسافر عشانه أنه قرار هيضيف نقله كبيره لمشوارك.
واختتم:أوعى تخلي الزعل من بعض المشاهد ينسيك أنت قدمت ايه للدراما ياريت قبل ما تقسوا على سامي بالطريقة دي نفتكر هو أمتعنا سنين قد ايه بمسلسلاته وأنا ذكرتها كلها عشان لو حد ناسي أفكره وعشان لو هو محبط يجمد تاني ربنا ينور طريقك وترجع أقوى وأقوى من أي وقت واثق فيك يا حبيبي وأنا هفضل أخوك الكبير وفي ضهرك إن شاء الله طول العمر يا بطل.
