”أخويا باعني”.. شيرين عبد الوهاب تخرج عن صمتها وتوضح صحة التسجيل الصوتي المسرب لحسام حبيب
خرجت الفنانة شيرين عبد الوهاب عن صمتها لتكشف صحة التسجيل الصوتي المسرب لطليقها المطرب حسام حبيب عن شقيقها محمد عبد الوهاب.
وقالت شيرين عبد الوهاب صدمة في تسجيل صوتي مع الإعلامي عمرو أديب عبر برنامج الحكاية المذاع على قناة mbc مصر: "فوجئت باللي حصل على السوشيال ميديا بين محمد عبد الوهاب وحسام حبيب، وحبيت أكد أن كلام حسام مضبوط جدا، وأن أخويا فعلا باعني، والتصريح اللي نزل دا نزل من محامي محمد شاعر المستولي على السوشيال ميديا بتاعتي، وبالتوكيل أنا كنت عاملة له قديم، مضى له ورقة أو عقد بتخليه يحصل على السوشيال ميديا بتاعتي، وموقعين بتاريخ قديم، كل كلام حسام حبيب مضبوط، اتعرضت لمؤامرة من أقرب الناس ليا وهو أخويا محمد عبد الوهاب وأنا بقولكوا متصدقوش أي كلمة منه وبشكر حسام إنه بيرد نيابة عني".
وأضافت: أنا مابحبش اتكلم عن مشاكلي الشخصية دلوقتي، عشان ماشغلش حد، والناس ماتقعدش تقول احنا ماورناش غير شيرين ومشاكل شيرين، لكن لازم تفهموا أن في أغاني حلوة جدا جدا، توما عاملها وعزيز الشافعي ومدين، وفي حاجات بتخلص من التصريحات عشان المشاكل مع الشركة المنتجة، في حد بشخصه قاصد يقعدني في البيت، بنخلص الحاجات دي والأغاني هتنزل وهتعجبكوا جدا، وبإذن الله الأغاني هتعجبكم.
وتابعت: برغم أن القضاء المصري حكم بانتهاء عقدي مع روتانا، هم لسه رافعين قضايا علي، وموقفين الدنيا كلها، لكني واثقة في نزاهة وقضاء بلدي.
واتمت حديثها: أنا اسفة اني بشيلكم أخباري، بس أنا اضطريت، صحيت لقيت مواقع التواصل الاجتماعي مقلوبة، وماليش دخل في اللي بيحصل دا، صدقوني أنا مش عايزة اضايقكم بأي أخبار عني حلوة أو وحشة، أكيد كل واحد عنده هموم ومشاكل، ودا اللي بيتقال معندناش غير شيرين، صدقوني مش قصدي، بدليل إني مكنتش بتكلم الفترة اللي فاتت، أنتم أهلي وسندي وأثبتوا لي كدة وبتردوا غيبتي، وأي بيان لي هيصدر من مكتب المحامي ياسر قنطوش، وانتم عارفين مين اللي بيقولوا الحقيقة، هو مش أهلي.
تسريبات صوتية لحسام حبيب عن أهل شيرين عبد الوهاب
وكان انتشر تسريبات صوتية لحسام حبيب يتحدث فيها عن أهل شيرين عبد الوهاب، حيث قال: الأغاني خلصانة وزي الفل وتحفة بس هي مش في المود ده من كتر اللي بيتعمل فيها من أهلها، هي مش هتطلع تتكلم عنهم لأنهم أهلها، لكن أنا قررت أتكلم لأن دول مش أهلي ولا يشرفني إنهم يكونوا أهلي، دول ناس ظلموها باعوا السوشيال ميديا بتاعتها متخيل؟".
