هشام حلمي بكر يتهم زوجة أبيه بخطف والده وتعذيبه في الشرقية.. والأخيرة ترد

اتهم هشام حلمي بكر، نجل الموسيقار حلمي بكر، زوجة والده باختطافه وتعذيبه رغم الحالة الصحية الصعبة التي يمر بها، وذلك خلال مداخلة هاتفية له ببرنامج كلمة أخيرة مع الإعلامية لميس الحديدي.

وقال هشام حلمي بكر في تصريحاته : حالة بابا مش كويسة خالص، حالته لا يرثى لها، عنده مشاكل كتير صحية، منها الكلى، وتقدم سنه أثر على ذاكرته وقدرته على التركيز في الأيام الأخيرة، وللأسف الشديد جاتلي أخبار عن طريق عمي كلمني من حوالي يومين قالي أني لازم أجي مصر في أسرع وقت لأن غالبا حلمي بكر في أيامه الأخيرة، وأنا فعلا بجهز أني أجي قريب.

وتابع: وأنا عايش في أمريكا من وأنا عندي 15 سنة، ومامتي وبابايا انفصلوا وأنا عندي 11 سنة، وعلى طول سيبت مصر، وأنا كنت على اتصال بوالدي أثناء الكورونا بس من ساعة الكورونا مقدرتش أشوفه، وعلاقتي مع أبويا مش التقليدية اللي بين أب وابنه لأسباب كتير.

هشام حلمي بكر: والدي بيتعذب من أفراد مرتبطين بمراته الحالية

وأضاف: بيجيلي أخبار عن المعاملة السيئة اللي عايش فيها والدي من مراته الحالية، وناس تانية متعلقين بمراته، مراته طلعته من بيته اللي هو بيت المهندسين اللي أنا اتربيت فيه وأنا صغير، ونقلته لشقة في الشرقية في الأرياف لا تليق بحلمي بكر ابدا، ومحدش عارف يوصل لحلمي بكر لأنهم واخدين منه تليفونه، وأنا بحاول اتصل بيه مش بعرف اوصله، فمراته الحالية مسيطرة على كل شيء وهي اللي بتعمل القرارات وفي أخبار تانية بتجيلي من الفنانة نادية مصطفى أنه جالها رسائل صوتية من أصدقاء حلمي بكر بيقولوا أنه بيغتال وبيتعذب من أفراد مرتبطين بمراته.

زوجة حلمي بكر ترد على اتهامات نجله بخطفه وتعذيبه في الشرقية

ومن جانبها خرجت سماح القرشي، زوجة الموسيقار حلمي بكر للرد على اتهامات نجله خلال مداخلة عبر برنامج "كلمة أخيرة"، حيث قالت: الكلام اللي بيتقال ده كله مش صحيح وهما نفسهم اللي عملوا ضجة في 2019 وقالوا جابت بلطجية.. مش عارفة الخانقة اللي بتحصل دي بسبب ايه وحلمي بكر لا يمتلك أي شيء دي حتى فلوسه اتسرقت، هو معهوش فلوس حتى يعالج بيها نفسه والبنك قافل على 5 مليون جنيه.

وواصلت: حلمي ذاكرته زي الفل لكنه مش بيتحرك خالص بقاله 4 شهور لكنه واعي ومدرك جدا للي بيحصل حواليه، زوجة وأما سمع الكلام اللي بيتقال عنه قال عيب أنا مش عيل صغير عشان اتخطف انا قاعد مع مراتي وبنتي.

وأوضحت: هو في محافظة الشرقية مش في الأرياف لكن في مدينة كفر صقر وإخوته كانوا هنا الأسبوع اللي فات قلنا نخليه يغير جو في هواء نظيف جينا هنا علشان أرعاه وعلشان أهلي يساعدوني فيه لأن الحمل كان عليا تقيل ومعندناش إمكانيات أننا نوديه مستشفى خاص لأن أمواله سرقت من مدير أعماله ومكنش ينفع نسيبه.

وأكدت سماح القرشي: مسموح لأي حد يزور الأستاذ حلمي بكر ومش بنمنع حد وأخواته جم لأخوهم وطلبوا ياخدوه معاهم ورفض ففي حين أنه كان تعبان بالقه ثلاثة اشهر ومحدش جاء زاره وهو نفسيا تعبان وبيقول الناس كانت محتاجني لما كنت على الشاشة ولما تعبت محدش فاكرني.

واتمت حديثها: احنا بنرد على الأرقام المعروفة المسجلة على تليفونه لكن بقية الأرقام غير المعروفة مش بعرف أرد عليها فيه صحفين كتير بيتصلوا وأنا عندي بنتي في مدرسة وعندي حالته مشغولة معاه.