مجالنا عادي نسلم ونبوس.. عارفة عبد الرسول تتصدر تريند جوجل بسبب تصريحاتها الجريئة
تصدر اسم الفنانة عارفة عبد الرسول تريند مؤشر البحث في جوجل بسبب تصريحاتها الجريئة، بعد لقائها مع الإعلامية ياسمين عز في برنامج "كلام الناس".
وتحدثت عارفة عبد الرسول عن منتقدي صورتها بالمايوه و علاقاتها بزوجها وكشفت بعض الاسرار في حياتها.
عارفة عبد الرسول عن حياتها قبل التمثيل
وقالت عارفة عبد الرسول، خلال حوارها مع الإعلامية ياسمين عز مقدمة برنامج "كلام الناس" عبر قناة "mbc مصر": قبل التمثيل أنا اشتغلت كتير، واشتغلت مع والدي في محل بقالة في إسكندرية وكنت باخد مرتب وبجيب بضاعة، وبعدين والدي فتح محل كوافير واشتغلت كوافيرة ولكني فشلت لأننا في وسط سوق شعبي والبنات هتطلع إزاي وسط السوق، وأنا في الجامعة اشتغلت مندوبة تأمين لأني اتعودت أصرف على نفسي وعلى طول بدور على شغل.
واستعادت عارفة عبد الرسول أغرب المواقف التي تعرضت لها في تلك الفترة قائلة: "أثناء فترة شغلي كوافيرة أكلت حاجب زبونة، وجريت ورايا بالشبشب في الشارع، وكانت مصممة تموتني من الضرب".
عارفة عبد الرسول عن علاقاتها بزوجها: بقول له يا أستاذ وهو بيقولي يا أستاذة
وواصلت عارفة عبد الرسول: أنا بقالي 44 سنة متزوجة، والفترة دي مكانتش سهلة وكان عندنا مشاكل وصعوبات وكفاح ولكننا كنا صحاب قبل ما نبقى زوجين وكنا بنحب التمثيل ولما اتخرجنا اشتغلنا في المسرح وأوقات الحياة بتكون صعبة، وأكيد فيه خناقات بيننا ولكن بنتصالح بـ فنجان قهوة وبقول له يا أستاذ وهو بيقولي يا أستاذة في الشغل.
توزيع ميراث عارفة عبد الرسول
واتجه الحديث عن توزيعها للميراث بالتساوي، قائلة: أنا بربي ولادي على التعاون والحب؛ لأن ابني أكبر من أخته بـ 6 سنين، وطول عمري مش بفرق وبحب أساوي بينهم في كل حاجة وعرفت إن فيه حاجة اسمها هبة وإني أهب الميراث ليهم وأنا عايشة، ولكن مرات ابني قالت لي طب والشرع بيقول إن الذكر مثل حظ الأنثيين؟ قولت إني مش قصدي أخالف الشرع وعايزة أساوي بينهم النص بالنص.
وعلقت عارفة عبد الرسول على منتقدي صورتها بالمايوه، والتي سبق أن نشرتها عبر حسابها بموقع فيس بوك، قائلة: "أنا إسكندرانية وإتعودنا ننزل البحر في الصيف، ولو عدى صيف من غير ما أنزل البحر ممكن يجيلي اكتئاب.. وكنت فرحانة ونزلت الصورة بمنتهى السعادة، ومكانش باين فيها غير كتفي، لقيت اللي يقول إتلمي يا ولية يا عجوزة، مش مكسوفة على دمك وإنت لابسة بكيني، مع إن مفيش بكيني في الصورة".
عارفة عبد الرسول: لبست "بكيني" وأنا صغيرة وحاليا عندي مايوه شبه البيبي دول
أوضحت عارفة عبد الرسول أنها تعودت مع أسرتها على ارتداء المايوه قائلة: "أنا من جيل لما كان المايوه يصغر علينا أبويا يجيب لنا مايوهات أكبر، وكنا نضحك على أي حد ينزل البحر بجلابية أو قميص وبنطلون.. وأنا صغيرة كنت ممكن ألبس بكيني، ولما كبرت بقيت ألبس مايوه قطعة واحدة، وحاليا عندي مايوه شورت شبه البيبي دول، وأراعي جسمي وسني، وممكن ألبس بوركيني".
عارفة عبد الرسول: عادي في شغلنا نسلم ونبوس
وأكدت عارفة عبد الرسول إن علاقتها بزوجها لا مكان فيها للغيرة بسبب مواقف تعتبر طبيعية في مجال عملهما، قائلة: مفيش بيني وبين جوزي غيرة، بالعكس لو شاف واحدة جميلة وقالي بقوله أه فعلا جميلة، وإحنا في مجال عادي نسلم ونبوس بعض ولكن مينفعش نطول في النظرة ولا السلام لأني بحس ساعتها إن فيه حاجة غلط.
يذكر أن عارفة عبد الرسول تشارك في الموسم الرمضاني 2023 من خلال مسلسل "بابا المجال" وهو بطولة مصطفى شعبان، باسم سمرة، نسرين أمين، سوسن بدر، جومانا مراد، رياض الخولي، سماء إبراهيم، محمود حافظ، أحمد كشك، محمد رضوان، هبه حسن، فرح يوسف.
