ياسمين عز توجه نصائح للزوجات خلال كأس العالم.. آخر 5 دقايق من الماتش اطلبي من جوزك أي حاجة

وجهت الإعلامية ياسمين عز ، نصائح للزوجاتة للتعامل مع الأزواج خلال فترة مباريات كأس العالم لكرة القدم، التي تنطلق خلال ساعات.

وقالت ياسمين عز خلال برنامجها "كلام الناس" المذاع عبر قناة MBC مصر: “سيبي جوزك طول الشهر في حالة روقان مع نفسه وبلاش الأسئلة التقليدية اللي بتعمل تصلب في الشرايين للرجالة وخاصة أعملك إيه على الغدا".

نصائح ياسمين عز

وتابعت "عز": "لو حسستي جوزك وقت الماتش إنك بتشاركيه اهتمامته، وقتها هيكون جوزك أسعد واحد في الدنيا، اقعدي اتفرجي معاه أسأليه بتشجع منتخب إيه، وإتفرجي معاه وشجعي من غير مبالغة".

وأضافت : "المخرجين في كأس العالم بيركزوا على المدرجات، وخاصة مع الستات الحلوة، فلما تلاقي جوزك بيبص ومبتسم، ده مش معناه إنه مش معجب بيها، هو مبسوط من الحدث نفسه، بلاش تنكدي عليه، هو حزين أصلًا عشان المنتخب مش في كأس العالم، يعني مش هتبقي إنتي والزمن ومنتخب السنغال عليه".

واستكملت: "آخر 5 دقايق في الماتش لو طلبتي من الراجل عينيه هيديهالك عشان يخلص ويعرف يركز في الماتش وهو غالبا مبيكونش سامعك أساسا ده أكتر هتلاقي في الحياة مسالم فيه".

واختتمت نصائحها، قائلة: "لو لقيتى جوزك بيندهك وبيقولك يا (ليفا) ولا يا (ليو) ولا (CR7) ده كده بيدلعك مش بيخونك أو نسي اسمك، دي أسامي لاعيبة عادي، ولو جوزك زملكاوي وهو بيتفرج على ماتش لتونس وقالك يا (جزيزي) عادي، ولو جوزك أهلاوي وقالك فين الشاي يا (علولو) كده يبقى بيدلعك مش ناسي اسمك، هو بينادي على الحاجة اللي قدامه، عديها".