محامي شيرين عبد الوهاب: أعلنت انسحابي بعد رؤية تقرير المستشفى
كشف المستشار ياسر قنطوش، محامي الفنانة شيرين عبد الوهاب عن تفاصيل أزمة موكلته مع شقيقها ودخولها مستشفى أمراض نفسية.
وقال ياسر قنطوش خلال مكالمة هاتفية لبرنامج "الحكاية" مع الإعلامي عمرو أديب: امبارح بليل الساعة 3 الفجر جالي مكالمة من استاذة سارة الطباخ، قالتلي الحق استاذة شيرين في مصيبه وقالتلي في حد خدها من يوم الخميس واحتجازها في المستشفى.
وتابع: تواصلت مع الفنان مصطفى كامل نقيب الموسيقيين، والذي تواصل مع الجهات المعنية من وزارة الداخلية، وأكد صحة تلك الأنباء؛ الأمر الذي استدعى التحرك الرسمي أمام النيابة العامة.
وأضاف : لم أتحدث مع شيرين منذ إتمام الصلح مع حسام حبيب، وهو لا يحبني ولا يوجد علاقة بيننا، وحذرتها من عدم إنهائه القضايا المرفوعة ضدها، ولكني مع مصلحتها، وسأدعم مصلحتها مع أي حد
واستكمل : أنا مع أهلها وأي حد مع شيرين أنا معاه، مع احترامي لسارة الطباخ وحسام حبيب، وأهلها لو هما معاها أنا معاهم مش ضدهم، اللي أنا عايز أوصله للأستاذ محمد أخو شيرين، اللي بيقول عليا إني مع مجموعة عصابة، وأنا هسامحه في الكلمة دي علشان خاطر شيرين بس، وأنا محامي شيرين من 3 شهور بس، وكل اللي عملته إني جبتلها حقها من حسام حبيب.
وعن سبب تواجدها في المستشفى، قال:وجدت في النيابة الصياغة اللي اتقالت ليا لما الناس جابتلي بتقرير أنها مريضة ومصلحتها إنها تفضل في المستشفى لأن أنا يهمني مصلحة شيرين عبد الوهاب.. المستشفى جاب تقرير طبي قدم مستندات بتقول إنها مريضة ومحتاجه علاج ورعاية، ولما عرفت كده خدت بعضي ومشيت.. وانسحبت فوراً مكملتش.
وأوضح: ولو أنا وجهت اتهام لأخيها بسوء فهم أنا هبعت حد يتنازل عنه، لأني مش ضد شيرين ولا ضد أهلها.
واستطرد: أنا تفاجئت بـ حسام حبيب واقف عند المستشفى اللي فيه شيرين، وقال أنت الوحيد اللي اتحركت علشان تنقذ شيرين، ولما سألته شيرين فوق بتعمل إيه قالي أخوها دخل التجمع الخامس وضربوها ودخلوها المستشفى غصب عن إرادتها.
