برسالة مؤثرة من سرير المرض..الفنان محمد صلاح يعلن إصابته بكورونا

أعلن الفنان محمد صلاح آدم عبر حسابه الرسمي بموقع التواصل الإجتماعي “فيس بوك” عن إصابته بفيروس كورونا المستجد كوفيد 19 وأنه يتواجد حاليا بمستشفي الصدر بالعباسية لتلقي العلاج .

وكتب محمد صلاح قائلا :”بكتبلكم وأنا على سريري في مستشفى صدر العباسية وبعد عمل أشعة مقطعية على الصدر اللي أكدت إني أصيبت بالوباء اللعين وقالولي اتأخرت ليه .. يمكن تكون آخر كلمات ليا في الدنيا دي “.

واضاف: “اترددت كتير بس لقيت نفسي مش قادر وبكتب .. لأني حسيت أحساس غريب حسيت إني مش خايف من الموت .. أنا خايف اني أموت قبل ماشوف النجاح .. أستغربت وقولت لنفسي أنت مش خايف من الموت ؟؟؟ قولت والله لا .. أنا خايف أموت قبل ماشوف نجاحي .. بلدنا بقى الحلم فيها .. إنك بس تشتغل .. أنت بس بتحاول طول الوقت انك تشتغل .. وتخبط على البيبان وكل البيبان بتتقفل في وشك .. شباب في أول عمرهم وشباب بقوا رجال ورجال أصبحوا كهول وبنات وسيدات موهوبين خريجين المعاهد والكليات الفنية وماوقفوش أمام كاميرا .. واللي هاجر واللي اكتأب واللي انتحر ..”

واستكمل حديثه :” أجمل مافي الوجود الحلم والطموح وأقبح مافي الوجود عدم تحقيق الحلم أو الطموح ده .. أرجوكم يا اصحاب #الاختيار في شركات الإنتاج من المخرجين ومساعديهم أو مديري الإنتاج أو المنتجين الفنيين أو المشريفين على الأنتاج أو أصحاب الورش الفنية أو الكاستينج دايريكتور أو صاحب المنتج الفني أو أو .. الموهوبين في مصر كتيييير واللي ضيعوا عمرهم في حب الفن ودراسته سنين كتييييير لكن معندهمش واسطة ولاصاحب ولا قريب مخرج ولا منتج ولا منتج فني ولا أبن نجم برضه كتييييير قوي ..”

وأضاف في حديثه :”أنا كل اللي بتمناه العدل .. أن الموهوبين دول ياخدوا فرصة من الفرص الكتيييير قوي دي .. معرفش أزاي ممكن يتحط النظام .. اللي بيه كل الموهوبين الدارسين أعضاء نقابة المهن التمثيلية ياخدوا فرصة .. واللي يثبت نفسه يكمل واللي مايثبتش نفسه الجمهور هايقول عليه لا .. بس بعد ما يكون أخد الفرصة .. فكرت ولقيت ان انسب حل .. وأنا يمكن ماحضرش تنفيذه أو حتى الموافقة عليه .. هو عمل بروتوكول ملزم بين الدكتور #اشرفذكي بصفته نقيب فنانين مصر ورئيس اكاديمية الفنون المصرية .. على فكرة #اكاديميةالفنون في #امريكا هي اللي بتمنح جائزة #الاوسكار ..والأستاذ #تامرمرسي بصفته رئيس مجلس إدارة الشركة المتحدة للخدمات الاعلامية اكبر وأهم شركة انتاج في الشرق الأوسط” .

وأختتم حديثه :”طبعا بعد كده ممكن كل شركات الانتاج والمخرجين يمضوا ويفعلوا نفس البرتوكول واللي لازم الجميع يتفق على بنوده و صياغته وأنا عندي ثقة كبيرة في كل القائمين على هذه الصناعة الكبيرة والعظيمة وفي قائدنا الحكيم المخلص السيد #الرئيس عبدالفتاح السيسي اللي أكيد هايرحب بالعدل أو شكل من أشكال تحقيق العدالة .. ويارب لو اتحقق الحلم ده .. وكنت يعني لاقدر الله مت أبقى مت وانا مستريح وسيبت لاولادي مايفخروا بيه “.