بعد الهجوم على دوره في ”سيد الناس”.. مها الصغير تدافع عن نجلها : ”الدور صغير ومينفعش يتحكم عليه”
خرجت الإعلامية مها الصغير عن صمتها لتدافع بقوة عن نجلها الفنان الشاب ياسين أحمد السقا، بعد الانتقادات الواسعة اللي طالته على السوشيال ميديا بسبب مشاركته في مسلسل "سيد الناس" خلال موسم دراما رمضان الماضي.
وقالت مها خلال برنامجها "الستات مايعرفوش يكدبوا" المذاع على قناة CBC:"الدور اللي عمله ياسين صغير جدًا، ومفيهوش مساحة كبيرة للتمثيل عشان الناس تحكم عليه كممثل فالهجوم الكبير عليه مش منطقي، لأن ده مش دور بطولة أصلًا".
وأضافت:"فيه شباب كتير زي ابني، وبيتعرضوا لهجوم مش مبرر لمجرد إنهم أبناء فنانين، مع إن ده شيء طبيعي جدًا إن أولاد الفنانين يدخلوا المجال ويتربوا فيه، زي دنيا وإيمي سمير غانم وأحمد الفيشاوي وأحمد السعدني، كلهم أثبتوا نفسهم بعد تعب وسنين".
مها وجهت رسالة للمنتقدين، قائله:"بالراحة على الشباب.. مش ابني بس، وبلاش نقد قليل الأدب! النقد لازم يكون بناء ومحترم، مش تجريح وتنمر".
واختتمت مها الصغير كلامها برسالة دعم قوية لابنها:"ياسين ممثل شاطر وبيتعلم، واللي جاي أحسن إن شاء الله.. ومينفعش ندفن المواهب بسبب قسوة التعليقات".
وكان ياسين السقا قد تعرض لانتقادات لاذعة بعد تجسيده شخصية "طارق"، شاب راجع من أمريكا للعيش مع أسرته في منطقة السبتية، وهي الشخصية اللي أثارت جدل بسبب طريقة الكلام المختلفة واللكنات.
ورد ياسين على الهجوم عبر حساباته على السوشيال ميديا قائلاً:"في ناس فعلًا بتنتقد باحترام، حتى لو الدور مكنش كبير ومش مفهوم أوي من الجمهور. أنا أتقبل ده تمامًا، وأنا داخل المسلسل وعارف ده. وفيه الحمدلله اللي فهموا الدور واللهجة والكلام المكسر ده عشان طارق عايش طول عمره في أميركا، أغلبية من الناس اللي هما فاكرين نفسهم نقاد، بيستخدموا الشتائم وبيتنمروا وبيجيبوا سيرة والدي ووالدتي بمجرد أن والدي أحمد السقا.. في ناس مجرد ده والدي وليه مش بتحبه شخصيًا، لازم يشتمني ويجيب سيرة الأم والأب، وحتى يدعو عليّ بالموت، وكان في كثير منهم".
الجدير بالذكر أن مسلسل "سيد الناس" هو بطولة: عمرو سعد، وريم مصطفى، وأحمد زاهر، وأحمد رزق، وإنجي المقدم، وخالد الصاوي، ومنة فضالي، ونشوى مصطفى، ورنا رئيس، وأحمد فهيم، وملك أحمد زاهر، ومن تأليف خالد صلاح ومحمد سامي وإخراج محمد سامي.
