”مش هنضحك من غير مبالغة”.. هشام ماجد يوضح فلسفة الكوميديا في ”أشغال شقة”
واجه الجزء الثاني من مسلسل "أشغال شقة" موجة من الانتقادات على مواقع التواصل الاجتماعي، خاصة بعد عرض بعض المشاهد التي اعتبرها البعض تنمرًا على شخصية الفنانة السودانية إسلام مبارك، وتجسيد الطبيب الشرعي في صورة سلبية.
ولكن الفنان هشام ماجد، بطل العمل، خرج عن صمته ورد بحزم، مؤكدًا أن الكوميديا بطبيعتها تعتمد على تضخيم العيوب والمفارقات.
وفي لقاءه ببرنامج "المشهد تاغ"، قال هشام ماجد:"أنا مش حابب أرد على الانتقادات لأنها مش في محلها، الكوميديا طول عمرها مبنية على إن الشخص يكون عنده مشكلة أو عيب، وده اللي بيخلق الضحك.. مش كل ما نتكلم عن حاجة تطلع ناس تقول تنمر".
أما عن الانتقاد المتعلق بشخصية الطبيب الشرعي "حمدي"، التي ظهرت في المسلسل كشخصية مهملة وغير كفؤة، أوضح ماجد:"يعني لو عملنا شخصية مهندس فاشل يبقى بنهين المهندسين؟ طبيعي إن في كل مهنة في ناس شاطرة وناس فاشلة.. إحنا عرضنا نموذج واحد، لكن فيه شخصيات تانية ناجحة في نفس العمل".
وفيما يخص شخصية "مدينة" التي قدمتها الفنانة إسلام مبارك، قال:"التنمر كان فين؟ الشخصية كان عندها مشكلة بتاكل كتير، بس إحنا متريقناش على شكلها أو لونها أو جنسيتها.. بالعكس، إسلام ممثلة شاطرة ومن بلد شقيقة، وهي نفسها ما كانش عندها مشكلة في الدور".
هشام ماجد عبّر عن استيائه من الانتقادات غير البناءة، قائلًا:"في ناس بتحب تنتقد لمجرد الهجوم.. لو العمل مفيهوش مشكلة كبيرة، يدوروا على أي تفصيلة يهاجموها.. بس أنا بحترم النقد لما يكون في محله أو يساعدنا نطور من شغلنا".
في نهاية حديثه، أكد ماجد أن الكوميديا تعتمد على تضخيم العيوب لرسم الابتسامة على وجوه المشاهدين:"لو شلنا كل المفارقات والعيوب، مش هيتبقى أي حاجة نضحك عليها.. الكوميديا من زمان مبنية على المبالغة، واللي مش عاجبه النوع ده من الضحك ممكن يتفرج على نوع تاني".
"أشغال شقة" مسلسل كوميدي من بطولة هشام ماجد، أسماء جلال، شيرين، سلوى محمد علي، مصطفى غريب، ومن تأليف خالد وشيرين دياب، وإخراج خالد دياب.
