السبب الحقيقي وراء وفاة الفنان نبيل الحلفاوي
أعلن الإعلامي محمود سعد عن أسباب وفاة الفنان نبيل الحلفاوي خلال فيديو نشره عبر حسابه الشخصي في موقع التواصل الاجتماعي "فيسبوك".
وقال محمود سعد: " في الأيام الأخيرة في المستشفى كنت بتكلم مع وليد الحلفاوي ابنه، قالي أنا عايز أقولك على حاجة "بابا قالنا كلام مهم عن علاقتكم ببعض وقالنا خلوا بالكم من محمود لما يحصلي حاجة هو اللي هيعملكم كل حاجة لما تحتاجوا حاجة خليكم معاه"، لأنه في يوم من الأيام وإحنا راجعين من دفن الكاتب أسامة أنور عكاشة قالي أنا عندي مشكلة أن التربة بتاعتنا في مكان ضيق هنعمل إيه، وقالي إنه عامل خريطة للمدفن للطريق ليه".
وتابع: "كان دايماً يقول لمراته لما أموت مين هيسندك، أنا العكاز بتاعك... مسابهاش في مرضها أبداً، ومكنش بيطلع من البيت عشان يبقى جنبها، أتمنى أعلم نفسي علشان أكون زي نبيل الحلفاوي، الراجل اللي عمره ما كان بتاع فلوس ولا حب الظهور في البرامج".
وعن حالته الصحية في أخر أيامه، أوضح: "مكنش في غيبوبة كان نايم مش عايز ياكل ولا يتكلم، كان أخوه غير الشقيق دكتور مجدي الصيرفي يسأله حاسس بينا يرمش بعينه، وبعدها بيومين، توفى بمنتهى الهدوء زي ما كان عايز، وعرفت أنه مريض بالمرض الخطير من الدرجة الرابعة بس مكناش نتصور أنه هيتوفى بهذه السرعة".
وأضاف: "لبسه كان متواضع جداً، ومالوش علاقة بالنجومية... عمره ما دخل في صراع مع أي حد، ورحل في هدوء".
الجدير بالذكر أن نبيل الحلفاوي رحل عن عالمنا الأحد 15 ديسمبر، عن عمر ناهز 77 عاما.
