إلهام عبد البديع تعلن عودتها لزوجها وليد سامي وتكشف سبب الانفصال

أعلنت الفنانة إلهام عبد البديع عودتها لزوجها الملحن والمنتج وليد سامي بعد الانفصال عنه لعده أيام قليلة، وذلك من خلال حوارها مع الإعلامية مروة صبري في برنامج "قعدة ستات" المذاع عبر قناة ألفا اليوم.

وقالت إلهام عبد البديع : اكتشفت إنه كتب بوست الانفصال وأنا مكنتش أعرف، كنت قاعدة بعمل حاجة ولقيت ناس كتير بتكلمني تقولي متزعليش، وأرقام كتير غريبة وصحفيين عايزين يعرفوا، وأنا مش فاهمة هو في إيه، لحد ما عرفت اتصدمت وقفلت التليفون شوية.

وتابعت: أول صحفي رديت عليه وسألني انتوا انفصلتوا قولتله آه، لأنه فعليا إحنا رايحين بكرة نخلص إجراءات الطلاق، وبعدها فوقت وقولت لا مش المفروض أرد على حد، أول مرة اتحط في الموقف دا مش عارفة أعمل إيه، وشايفة إن ده تصرف مينفعش منه، لإن إحنا اتفقنا إننا هنعلن في وقت معين، وهنعلن إحنا الاتنين، مش هو يعلن وأنا اتفاجئ.

وأضافت: اتطلقنا طلقة واحدة ودار الافتاء قالت مش محسوبة لأسباب كتير، وهو مسح البوست بعدها ربما يكون نزله وقت غضبه، بس أنا زعلانة إن الناس كلها بتتكلم على حياتي الشخصية مش عن عمل فني، وزعلانة إن وليد استعجل وأعلن، والنهاردة طالعة أقول إحنا رجعنا خلاص، وشكرا لكل أصحابي المقربين اللي تدخلوا، ومبسوطة من كلام الناس الحلو على السوشيال ميديا.

وعن سبب الانفصال، أوضحت: ضغوط الحياة بينا والتراكمات خليتنا ناخد الخطوة دي، وكمان أنا متربتش في بيت في أب وأم، لأني كنت عايشة سنين طويلة مع جدتي، فمش عارفه أوي معنى الحياة، فطبيعي يبقي فيه تقصير، وفي بداية الزواج طلبت منه يراعي إني في حاجات معرفهاش وهتعلمها مع الوقت، فطبيعي يكون زهق شوية، مشاكل عادية مش زي ما الناس قالت إنه خاني أو أنا اكتشفت عنه حاجة والكلام دا.

وواصلت: أكتر حاجة ضايقتني لما الناس قالت دي دعاية علشان مسلسل. عندنا عناصر كتير تنجح المسلسل من غير من نسوأ شكلنا قدام الناس بدعاية سلبية، وإحنا شغالين على أغنية للمسلسل كلنا هنغني فيها.

وكان وليد سامي أعلن عبر حسابه الرسمي عبر موقع التواصل الاجتماعي "إنستجرام" عن انفصاله عن زوجته إلهام عبد البديع في منشور رسمي وعلق: "كل شيء قسمة ونصيب، أنا وإلهام انفصلنا وبشكرها على كل حاجة حلوة كانت بينا، وربنا يوفقها ويكتب لها الخير"، ولكن بعد مرور وقت قليل قام بحذف المنشور.

الجدير بالذكر أن إلهام عبد البديع احتفلت بزواجها من وليد سامي عام 2022 في حفل اقتصر على تواجد الأهل والأصدقاء المقربين من العروسين.