”دكتور نفسي للمقبلين على الزواج وشروط لمن يرغب في الإنجاب”.. إيمان العاصي تتحدث عن القوانين التي تتمنى تغييرها

بعد نجاح الفنانة إيمان العاصي في تقديم دور الأم في مسلسل "برغم القانون" الذي يعرض حالياً عبر قناة ON ومنصة Watch It، قالت خلال لقائها مع الإعلامية إنجي علي عبر برنامج أسرار النجوم" المذاع على "نجوم FM" إنها تتمنى تعديل بعض القوانين.

وقالت العاصي: "قانون نفسي يتحط أن يكون إجباري في دكتور نفسي يقعد مع المقبلين على الزواج، الجواز مسئولية رهيبة، ولازم يبقى في قانون مش أي حد من حقه أنه هيخلف، مينفعش إني يبقى أنا مش معايا قوت يومي وأروح أخلف، لازم يتعاقب دا عدل ورحمة، مينفعش أجيب مخلوق في الدنيا وأنا مش قادرة أكله وأوديه مدرسة وألبسه عشان أحس بالأمومة دي أنانية رهيبة".

وتابعت: "في قانون نفسي يتغير قانون تعنيف الأسرة، ربنا إدانا الأطفال هما مش أملاك دي أمانة في وقت من الأوقات بنسلمهم للحياة بعد ما نكبرهم ونربيهم ونعلمهم دا دورنا، لكن الأهالي اللي بتعذب عيالها، عذاب مينفعش يتحكي، اللي يفكر أنه يؤذي مخلوق معندوش قدرة يدافع عن نفسه وأي راجل بيضرب مراته نفسي يكون القانون يبقى عادل وقاسي جدا عشان محدش يفكر أنه ممكن يتحكم في حياة إنسان أو يعذبه".

وأضافت: " القانون اللي نفسه أشيله هيكون ليه علاقة بقانون الأسرة لأنه فيه ثغرات كتير، مثلا أم تخطف عيالها من أبوهم، أو أب يخطف العيال وميوريهومش للأم، القانون لو روحتي تقدمي بلاغ هيتقال مفيش أب بيخطف عياله، طبيعي لكن لكل قاعدة شواذ، في الحالة دي لما النيابة تتحرى هتعرف أنه خطف الأم أو الأب مش عارف يوصل لأولاده، نفسي يتحط قانون للأهالي اللي بيحرموا الأولاد من حياة طبيعية".

أبطال مسلسل "برغم القانون"

الجدير بالذكر أن مسلسل "برغم القانون" يشارك في بطولته كل من إيمان العاصي، هاني عادل، محمد القس، وليد فواز، عابد عناني، رحاب الجمل، فرح يوسف، عايدة رياض، محمد محمود عبد العزيز، جيسيكا حسام الدين، نبيل على ماهر وعدد آخر من الفنانين، تأليف نجلاء الحدينى وإخراج شادى عبد السلام وإنتاج الشركة المتحدة وشركة فنون مصر للمنتجين ريمون مقار ومحمد عبد العزيز.