والد ضحية نجل محمد رمضان يكشف تفاصيل الواقعة: الفنان حرض ابنه على ضرب ابني
كشف محمد سالم، والد الطفل عمر تفاصيل الواقعة التي وصلت للجوئه لقسم الشرطة والنيابة ضد نجل الفنان محمد رمضان .
وقال سالم، خلال برنامج "الحكاية" للإعلامي عمرو أديب والمذاع عبر قناة "إم بي سي مصر": الموضوع عبارة مشادة بين أطفال، والطبيعي له طرق للحل، لكن للأسف المشادة اتقال فيها كلام من عينة انتو متعرفوش أنا مين؟ وأنا ابن مين؟.
وتابع: الأطفال كانوا بيلعبوا عند الألعاب المائية عند الزحليقة، فحد تقريبًا خبط في ابن الشخص اللي أنا مدعي عليه، ابني تدخل عشان يحوش بين الاثنين، فالوالد قاله انت متعرفش أنا ابن مين؟ وبعد كده حصل تلاسن وتجاذب بالأيدي.
وأضاف: الموضوع خلص على كده، ابني مشي خلاص ولقيت ابن محمد رمضان بيتصل بوالده ومسك الموبايل وصور ابني تقريبا كان مشغل فيديو كول وبيشاور على ابني وأصحابه وبيقول هما دول.
وواصل: وبعدها مشي ورا ابني ودفعه جوا الحمام وقفل عليه باب الحمام ومش قادر أفهم ازاي طفل صغير يفكر في كدة ولا حد قاله يعمل كدة.
وأكمل: أنا هسيب الموضوع للنيابة، حد من أصدقاء ابني فتح له الحمام، وخرجوا لقوا محمد رمضان غاضب جدًاو قعد يزعقلهم بنوع من التهديد، وخدهم وادهم لابنه وبدأ يقوله مين فيهم اللي ضربك؟ فشاور على ابني فقام قايله حاجة في ودنه وفاجأة لقيت ابنه ضارب ابني قلم جامد وكل ده عندي ليه أدلة وشهود.
واختتم تصريحاته: "ابني بدأ يعيط بهستيريا، وطلبت من إدارة النادي تفريغ الكاميرات ومكانش في رد حازم، ولهذا السبب صعدت الموضوع للقسم وبعدها النيابة".
