ميرنا وليد تكشف سبب غيابها عن الفن

كشفت الفنانة ميرنا وليد، أسباب غيابها عن الوسط الفني بعد أخر عمل لها بمسلسل "قيد عائلي"، وذلك خلال لقائها في برنامج "من العلمين" عبر قناة ON.

وقالت ميرنا وليد: "كل عمل بيبقى بظروفة يعني "ذئاب الجبل" بعدها على طول دخلت معهد السينما قسم إخراج، درست إخراج فبعدت عن التمثيل تماما، رغم أن الفترة دي كان لازم استغلها في التمثيل لكن لما بتاخدي قرارات مصيرية في السن الصغير مش دا السن الصح اللي تاخدي فيه قرار في حياتك العملية تحديدا".

وأضافت: "بعدها عملت مسلسل "قاسم أمين" وفي الوقت ده كان في حرب في العراق وسياسيًا الناس مكنتش مهتمة، بعدها عملت مسلسل "قصة الأمس" واتجوزت وبقيت حامل في بنتي "مريم" وبعدها حامل في بنتي "مايا" وبعدها الثورة".

وتابعت: "المشكلة أن بعد ما تعملي عمل حلو أوي بيجيلك كمية أعمال كتيرة لكن بيكون في حاجات بيصعب عليكي أن تقبليها، مكنش ينفع أعمل أي حاجة بعد "قصة الأمس" واستنيت يجيلي حاجة كويسة سنين لحد ما جالي "قيد عائلي" وهو كان عمل هايل ودوري كان جديد، المشكلة لما بتعملي عمل قوي ويسمع أوي بشيل هم بعده هعمل إيه، ولما بيجيلي أي حاجة بتصعب عليا نفسي ونجاحي".

واختتمت: "مش بخاف إني أبعد عن الجمهور لأن الناس عودتني أن مهما بعدت بلاقيهم بيتعاملوا معايا إني موجودة، كمان الأعمال الكويسة بتتعرض على طول، مثلا "قصة الأمس" بقاله سنين لكن مفيش كل 3 شهور قناة ما بتعرضه و"ذئاب الجبل" لحد النهاردة بيتعرض".