اشتغلت حداد مع جدي بـ 5 جنيه و جبت عربية بتكيف اتفعصت.. أبرز تصريحات محمد هنيدي في”بيت السعد”
حل الفنان الكوميدي محمد هنيدي، أمس الأربعاء، ضيف على برنامج "بيت السعد" الذي يُعرض على قناة MBC مصر، ويقدمه الشقيقان أحمد وعمرو سعد.
وقال محمد هنيدي خلال الحلقة:اشتغلت في ابتدائي بس مكانش الهدف الشغل، كان الهدف أني أريح أهلي عشان كنت عامل قلق في امبابة كلها، وكان خال أمي بيشتغل مقاول حدادة فقالت له والنبي يا خالي خد الواد دا ريحني منه وطلبت منه أخد 5 جنيه في اليوم، و نزلت معاه الشغل فجدي قالي تعرف تشتغل بالمرزبة قولتله أكيد وروحت بالمرزبة على أيده والإسعاف جت خدته وبعد كل دا كنت بتخانق معاهم أني عايز اليومية بتاعتي لأني مخدتهاش، وخدتها في الأخر وقعدت معايا سنة.
وعن الـ 10 آلاف جنيه، قال: كان عندي عربية أونو بس مكانش فيها تكيف وكنت بعمل مسرحية ألابندا فجه أستاذ سمير حبيب قالي يا محمد هنعمل مسلسل تيمون وبومبة قولتله كويس هتدوني كام قالي هنديك 10 آلاف جنيه قولتله بس عندي شرط أنتم عايزين الشغل في اد ايه قالي قدامك شهرين قولتله لا هخلص في 10 أيام على شرط تديني الفلوس دلوقتي عشان رايح أجيب عربية بتكيف.
وتابع: وروحت جيبت العربية وركنتها خلصت المسلسل في 10 أيام وجالي شهادة من ديزني أني صورت في وقت قياسي، وبعد ما خلصت المسلسل كلمني المنتج عصام إمام علشان عندنا عرض لمسرحية ألابندا في مسرح الفردوس، وقولتله فيه مفاجأة معايا وفجأة أنا ماشي بالعربية في شارع الهرم ورايح المسرح فجأة اتوبيس خبطتني من اليمين وواحد من الشمال وكملت بالعربية مفعصة، ووقتها عصام إمام قعد يلطم لما شاف العربية.
وتحدث هنيدي عن معاناته في مشواره الفني، قائلا: كنت من زمان بحلم إني أكون ممثل مشهور ولكن بحدود ومكنتش متوقع المكانة اللي وصلتلها خالص، ودايمًا ربنا بيبهر العبد وبيديك أكتر ما بتتمنى.
وأضاف: "15 سنة قبل فيلم اسماعيلية رايح جاي، كان في رحلة معاناة، هي مكنتش معاناة لدرجة التعذيب، لكن كانت معاناة في بداية المشوار واترفضت في شغل كتير".
وواصل: "شاركت في عمل وصورت يوم واحد وكنت لسة جديد واكتشفت إنه مش هينفع أقدم نفسي في العمل مقتنعتش يعني، اعتذرت ومشيت وعملوا ليا مشاكل بس مشيت".
وأتم: "طوال المشوار بتاعك حاسس إن ربنا يكرمك، ودايما ربنا بيبهر العبد يديك أكتر ما بتتمنى، وكله بفضل الله بتلاقي مشوارك بقى موضوع كبير".
على الجانب الأخر، ينتظر محمد هنيدي، عرض فيلمه الجديد الذي يحمل اسم "الجواهرجي"، ومن المقرر عرضه خلال الشهر المقبل، وهو من تأليف عمر طاهر ويخرجه إسلام خيرى، ويشاركه البطولة منى زكي و أحمد صلاح السعدني ولبلبة وتارا عماد.
أخر أعمال محمد هنيدي
يذكر أن أخر أعمال محمد هنيدي تقديمه مسرحية "ميوزيكال سكول" قدم قبل انطلاق موسم رمضان 2024، وذلك ضمن فعاليات موسم الرياض، وشاركه البطولة نرمين الفقي ومحمد ثروت ومحمود حافظ ونانسي صلاح وريهام الشنواني وأحمد محارب وخليفة سمير ويوسف وائل نور وألحان المهدي وأحمد عمرو ومريم محروس، وهي من تأليف أحمد محارب وخليفة سمير، ومن إخراج خالد جلال.
