وكيل أحمد رفعت يكشف تفاصيل الأزمة التي أدت لتدهور حالته الصحية

كشف نادر شوقي وكيل الراحل أحمد رفعت لاعب مودرن سبورت، عن تفاصيل الأزمة التي تسببت في تعرضه لحاله نفسية وادخلته في وعكة صحية شديدة قبل وفاته.

وقال شوقي في تصريحات لبرنامج "الكورة مع فايق" المذاع عبر إم بي سي مصر 2: أحمد رفعت كان على قوة نادي مودرن سبورت خلال الإدارة السابقة، وتم إعارته لنادي الوحدة الإماراتي، وكان لا يحق له الخروج خارج البلد قانونا، وكان يجب على ناديه إنهاء إجراءات استخراج تصاريح سفره واتقال إن فيه تصاريح اتعملت، التصاريح دي متعملتش.

وتابع: فلما سافر رفعت عرف إن موقفه في السفر غير قانوني وبعدها دخل في حالة نفسية سيئة وفسخ تعاقده بالتراضي مع ناديها، وقعد شهر في الإمارات مش بيلعب كورة، ورجع القاهرة، وقالي أنا مش عايز أعمل حاجة غير قانونية.

وأضاف: رفعت كان خايف يرجع مصر وطلبت منه يفضل في الإمارات حتى لما المشكلة تتحل وتكون عودته لـ مصر قانونية، وكنت قاعد بقالي سنة بقول يا جماعة حلوا القصة، لحد ما رفعت وقع.

وواصل: أنا حصلت على فلوس رفعت كلها من نادي الوحدة لما عرفوا كل حاجة، عشان ناس محترمة، محدش تدخل خالص عشان يحل أزمة أحمد رفعت، وأحمد لما اختفى مكنش مصاب و اسألوا عبد الظاهر السقا وعلي ماهر.

وأتم: ووالدة أحمد رفعت شافت موت ابنها مرتين مش مرة واحدة، وكانت بتكلم ناس عشان تتوسلهم يحلوا المشكلة، بس كان لازم القانون يتنفذ.