عمر كمال يكشف لأول مرة تفاصيل ارتباطه بـ طليقة أحمد الفيشاوي والسبب وراء انفصالهما
تحدث المطرب عمر كمال، لأول مرة عن تفاصيل ارتباطه بـ ندى الكامل، طليقة الفنان أحمد الفيشاوي، وذلك خلال لقائه مع الإعلامية أميرة بدر في برنامج "خلاصة الكلام" المذاع عبر قناة النهار.
وقال عمر كمال: أنا مبحبش أتعرف بموضوع عاطفي أو شخصي، وزعلت لما علاقتي اتعرفت لأن مردودها عند الناس مكنش كويس ومش عارف الناس شافت الموضوع إزاي.
وتابع: أنا في الفترة دي مكنتش متزن نفسيًا ومكنتش بنام غير بأدوية ومهدئات، وسلوكي مكنش مظبوط، والأدوية كانت مأثرة عليا لدرجة أن ممكن حد ياخد مني مبلغ وأنسى خالص، وكنت باخد الأدوية دي بدون علم وناس وصفتلي ودخلت في متاهة، والموضوع قلب معايا بهلوسة، ومرة مدير أعمالي راح جابني من على الدائري وأنا خابط العربية، وتاني يوم معرفتش أني عملت كده، والسنة والنص دي أثرت على شغلي.
عمر كمال: أنا اللي خدت قرار الانفصال عن ندى الكامل لإن التجربة ضرتني
وأضاف: ممكن الغلط يكون من عندي لأني عملت في نفسي كده، هي مكانتش فاتحة خير عليا والمفروض الإنسانة اللي معايا لما تلاقيني بميل ناحية الغلط متميلش معايا لأ تعدلني، تجربة مكانتش حلوة عليا السلبي فيها أكتر من الإيجابي، وأنا اللي خدت قرار الانفصال لأني كنت بقع ومش نفسي، أنا حبيتها أكيد ولكن التجربة ضرتني.
وواصل: ربنا حبيبي، وفي كل موقف في حياتي كنت هقع فيه شالني، وربنا عمل ده ممكن يكون علشان أمي أو اخواتي أو خير بعمله أو علشان براعي ربنا في فرقتي، أنا دايمًا بصحي نفسي ودايمًا عندي النفس اللوامة، وطول ما أنا بدخل ربنا في طرف الميزان همشي كويس.
عمر كمال: عصيت ربنا.. ولما فوقت رفضت ارجعلها
واستكمل: ممكن أكون في علاقة وعصيت ربنا، فا ربنا يديني قلم ويكسرني علشان يسمع صوتي، وأنا فوقت وحاولت ترجعلي وأول ما أتأكدت أني مش راجع شوفت الوش التاني، وناس تانية ظهرت، طب ده أنا قرأت دراسة بتقول أن الشخص الطبيعي السوي العادي علشان يطلع من علاقة ويستشفى منها عايز 6 أشهر، وبدأ ربنا يبينلي حكمته وأن قراري صح.
واتم حديثه : ده أنتي لو عندك جاكيت ولبستيه في مناسبة بيصعب عليكي تشحتيه، ولو عندي عربية بتصعب عليا وبحن لها، وتأكدت أن قراري كان صح وفوقت والدنيا بقت أحلى كتير.
