بسمة وهبة لـ ميار الببلاوي بعد تصريحاتها الأخيرة: بتفضحوا نفسكم في سبيل التريند
خرجت الإعلامية بسمة وهبة عن صمتها وردت على تصريحات الفنانة المعتزلة ميار الببلاوي التي أثارت الجدل خلال الأيام الماضية بسبب ظهورها في برنامج "العرافة" في رمضان 2024 .
وقالت بسمة وهبة في فيديو بث مباشر على حسابها الرسمي بموقع تبادل الصور والفيديوهات "إنستجرام": الأخت ميار الببلاوي، أنا هتكلم الأول على الحتة اللي تخصني، مع أن عمرى الحقيقة ما رديت على حد حتى لو كلامه كدب وده بيحصل كتير أوي، في العرافة ناس كتير تكون طلعت وحلقاتها تكون معملتش تريند أو عملت تريند وعايزين تاني، فبيتقولوا حاجات لنفسهم ويعملوا فضايح لنفسهم في سبيل التريند.
وتابعت: أنا بطنش وأقول خليهم ياكلوا عيش وده بيحصل كتير، أستاذة ميار الببلاوي، إنت شغالة في مجال الإعلام، وأظن إن مونتاج المحطة مجابش كلام وحطه على لسانك، ولا جاب صوت واحدة تانية وحطه مكان صوتك، ودليل كلامي إنك طلبتي بعد الحلقة حذف كلام اتسرعتي فيه وقلتيه والنبي يا بسمة شيليه وقلتلك من العين دي، وأنا طلبت من إعداد البرنامج يشيله، وأنا عندي الماتريال الأصلي للحلقة ، وحجة إنه إتعمل مونتاج على طريقة ولا تقربوا الصلاة ده كلام لا حلو في حق المحطة، ولا في حقي، ولا في حق البرنامج ولن أقبله، ساكتة ليه من يوم ما الحلقة اتعرضت ما دام مضايقة.
وأضافت: مبحبش اللي بيجي على الولايا، الشيخ وصل بيه الأمر أنه يوصفك بالزنا، بحب الأزهر ورجال الدين، ومبحبش حد يجي جنب شعرة منهم، دا مش نفس نهج سيدنا النبي أبدا، ولادي طريقته، مينفعش الكلام اللي قلته دا بيتعارض مع الخطاب الديني، هاتلي 3 شهود غيرك يؤكدوا حكم الزنا اللي قلت.
وفي نهاية الفيديو وجهت بسمة وهبة رسالة لنجل ميار الببلاوي قائلة: "يا ابني حرام عليك أمك ملهاش غيرك، مينفعش تقاطعها، إنت راجلها والمفروض تطلع تدافع عنها".
