ريم البارودي تكشف عن كواليس حلقتها مع ريهام سعيد: قالتلي اعتمدي عليا ولبستنا في شجرة
تحدثت الفنانة ريم البارودي عن تفاصيل أزمتها مع الاعلامية ريهام سعيد، خلال حوارها مع الإعلامية بسمة وهبة مقدمة برنامج "العرافة"، على قناتي المحور والنهار.
وقالت ريم: كنت مسافرة أعمل عمرة، وريهام كلمتني وقالت لي عاوزين نعمل حلقة عن عودة الصداقة، لكن الحلقة مكنش فيها أي عودة صداقة.
وتابعت:برومو الحلقة كله كان إني بتاجر بأبويا، طالعة بعيط وموسيقى خلف الأسوار ورايا، وأصرت إنها تصور لعرض الحلقة في رمضان، لكنني أصريت على الرفض لأنني كنت هروح العمرة، ولما رجعت كنت مرهقة جدا وقلت لها عشان خاطرك هنعمل الحلقة رغم إني مش محتاجة ماديا، ووافقت عشانها وهي جات لي العزاء.
واضافت:ريهام مبتعتمدش على سكريبت وقالتلي اعتمدي عليا لما سألتها عن الحلقة، لكن اللي حصل إننا صورنا الحلقة ودخلنا في شجرة ولا حد شافنا، لأن الحلقة نزلت قبل رمضان بيوم، ازاي هنتشاف؟!".
وعن سبب عدم رضاها عن الحلقة، قالت: "أول ما بدأنا نصور لقيت نفسي متهمة وفتحت مواضيع وقالت إنت شتمتيني، والشخص اللي استعانت به كشاهد، وحصلت على حكم سنة عليه، تهربت من ذكر اسمه".
وواصلت:ساعة عرض الحلقة كنت مسافرة برة مصر، وقلت لها إني مش هشوف الحلقة، وساعة عرض اللقاء نشرت بوست علشاني صورة كلب مطلع لسانه، وتجاهلتها تماما وقلت عند الله تجتمع الخصوم.
وعن تصويرها أثناء قيامها بالتدخين، أوضحت :"مكنتش عارفة إنهم بيصوروا، ودخنت على أساس إننا في راحة".
آخر أعمال ريم البارودي
يذكر أن آخر أعمال ريم البارودي مسلسل "نقل عام" بطولة محمود حميدة، دينا، سميحة أيوب، محمد محمود عبد العزيز، محسن محي الدين، ومن تأليف وليد خيري، إخراج عادل أديب.
