”حصل مضاعفات مش لطيفة”.. داليا مصطفى تعلن إصابتها بمرض السكري

أعلنت الفنانة داليا مصطفى عن إصابتها بمرض السكري، خلال فيديو نشرته عبر حسابها على موقع التواصل الاجتماعي "إنستجرام".

وقالت داليا: "كنت منزلة صورة أنا وأختي وكنت لابسه فيها الجهاز ده "جهاز استشعار" بتاع السكر، ده جهاز السكر عشان في ناس مكنتش فاهمة ده جهاز إيه بالظبط، بعد ما نزلت الصورة وأنا كنت بتصور عادي، أمهات كتير بعتولي وناس منظمة لمعارض وحاجات للسكر شجعوني جدا وانبسطوا أوي إني لابساه ومش مكسوفة، وأمهات قالولي شكرا طلعتي بشكل عادي بالمنظر ده والجهاز ده خلى أولادنا عندهم ثقة أنهم يلبسوه ومش مكسوفين خالص".

وتابعت: "إحنا يمكن معندناش التوعية دي إن مفيش داعي للتنمر لو في تنمر، أنا شايفه أن الأطفال أو حتى الستات اللي بتبقى مكسوفة تلبس الجهاز ده لو لابسين نص كم، على فكرة مش فارقة مش مهم رأي أي حد فيا أنا مستريحة كده الجهاز ده ريحني جدا".

وأضافت:"كان سكري قبل كده صعب بيوصل لـ8 ومرضى السكر هيفهموا يعني إيه دي حاجة مش لطيفة، كنت بكره الشكشكة حاجة بتضايقني وكنت سايباها كده وحصل مضاعفات مش لطيفة و فجأة روحت لدكتور عظيم قالي في جهاز، وقلتله إني سمعت إنه نزل من كام سنة بس مش في مصر قالي لأ موجود وفعلا ركبته ".

وأوضحت:" هو جهاز أكتر من هايل بيقيس السكر زي رسم بياني، لما بيكون عالي باخد أنسولين، ولما بيكون واطي بيدني تنبيه فأخذ حاجة، أنا مش بعمل إعلان وبالمناسبة أنا مش عارفة إيه ماركة الجهاز ده أصلا ".

وأتمت:" أنا بقولكم وبشجع أي واحدة وطفل أو طفلة عندها سكر أن ميهمهش أي حد، كل واحد مشغول بحاله متفكروش في حاجة وفكروا في نفسكم وبس وربنا يشفينا كلنا".