ريهام سعيد لـ بيومي فؤاد: 2 مليون ونص فلسطيني بيتقطعوا حتت مش محترمهم ليه

علقت الإعلامية ريهام سعيد على رسالة الفنان بيومي فؤاد التي وجهها للجمهور على خشبة المسرح، بعد انتهاء عرض مسرحيته الجديدة زواج اصطناعي، في المملكة العربية السعودية.

وقالت ريهام سعيد خلال برنامجها الشهير "صبايا الشمس" : ما ينفعش تنتقد محمد سلام لإن موقفه موقف محترم، ومينفعش تغلط في اللي عمل الصح، بيومي فؤاد قال كلام مستفز، وأنا وضعي صعب لأن بطاقتي مكتوب فيها ممثلة، لكن إنت كده ضحكت على نفسك يا بيومي.

وتابعت : والشعب السعودي على راسنا من فوق، إيه دخل ده في إنك رايح تقدم مسرحية تضحك؟ كلنا لنا الشرف نتصور مع السعودي والإماراتي واللبناني، إيه دخل ده في إن كان في مستشفى بينضرب وناس بتموت والدم سايح في كل حتة؟ إنت رايح تضحك بدليل إنك فنان كوميدي، وبدلت محمد سلام بكوميديان هو محمد أنور، وناس كتير شايفة مكانش يصح تضحك في الوقت ده، والأسبوع اللي محمد سلام إتكلم فيه كان وضع صعب جدا وما زال.

واحتتمت: "يعني إنت احترمت ناس دفعت تذاكر علشان تروح مسرحية، ومش محترم الفلسطينيين ليه؟ 2 مليون ونص فلسطيني بيتقطعوا حتت مش محترمهم ليه ومش محترم شعورهم؟".

رسالة بيومي فؤاد المثيرة للجدل

وقال بيومي فؤاد بعد انتهاء عرض مسرحيته الجديدة زواج اصطناعي: من حقك تعتذر "كلمته موجهه للفنان محمد سلام" عن المسرحية لكن مش من حقك تغلط في فنك، احنا مش بنيجي عشان نضحك حضراتكم، احنا بنقدم فننا، أنتو بتحترمونا واحنا بنحترمكم جدا، شيء عظيم أن الفنان يبقى ليه جمهور في كل الدول، شيء عظيم أني أتصور مع شاب سعودي أو سيدة سعودية، وهي تعلم أن أنا مصري، أنا بشرف بلدي.

وتابع: كنت بحاول أخفف عن الراجل اللي أنقذ موقف وكان قدها اسمه محمد أنور، أنا فنان مصري وليا الشرف، جيت المملكة العربية السعودية وليا الشرف، كتر خيركم، احنا بنتعب وبنشقى عشان نقدم فن، مش عشان نيجي نضحك.

وكان الفنان محمد سلام أعلن اعتذاره عن تقديم مسرحية زواج اصطناعي، في المملكة العربية السعودية، بسبب الأحداث الجارية في غزة، وذلك من خلال منشور عبر حسابه الشخصي على موقع تبادل الصور والفيديوهات إنستجرام.

يذكر أن مسرحية زواج اصطناعي يشارك في بطولتها عدد كبير من النجوم والنجمات، منهم: مي عز الدين، بيومي فؤاد، محمد أنور، سليمان عيد، إيمان السيد، دنيا سامي، وغيرهم.