عمرو أديب لـ منتقدي الفنانين بسبب إعلانات رمضان: بشويش عليهم عندهم مسؤوليات وأقساط

علق الإعلامي عمرو أديب على الانتقادات التي واجهت بعض من الفنانين خلال الفترة الماضية، بسبب مشاركتهم في حملات إعلانية خلال شهر رمضان .

وقال عمرو أديب : "كل سنة المعلنين المبجلين في مصر يختاروا فنانين يعملوا إعلانات، فجأة الشعب المصري قرر يصنف هذه الإعلانات إلى إعلانات شيك وإعلانات مش شيك".

وتابع "أديب" خلال تقديمه برنامج "الحكاية" عبر قناة MBC مصر 2: "دي كلها منتجات فاتحة بيوت، والفنان عمله بيع وجهه، وده أكل عيشه، يعني لما يقولوا محمد منير عمل إعلان سمنة وزيت، إحنا مقطعين بعض على السمنة والزيت، أو يقولوا حسين فهمي عمل إعلان بوكسرات، وإيه يعني كلنا بنلبس بوكسرات، والراجل بيتكلم عن القطن والنسيج المصري".

وأضاف: "ايه اللي فيها وايه يغضب ربنا لما حسين فهمي ولا منير ولا العسيلي ولا الناس دي تعمل إعلان وبعدين دا منتج مصري، بشويش على الناس يا جماعة، ايه فكرة إننا نخلص صيام ونشوف هنقطع في مين النهارده".

واستكمل: "الفنانين اللي بيعملوا إعلانات زيهم زي غيرهم عندهم مسؤوليات وأقساط ومدارس، وبيصرفوا على نفسهم كتير عشان يظهروا قدام الناس، ودول قوتنا الناعمة والإعلان مش حاجه تافهة"،

وواصل : "ايه المانع كهربا يطلع في إعلان الراجل عنده غرامه عايز يدفعها، بس بستغرب لما بتحب انسان وفي ثانية تنساه، إزاي تنسوا منير وحسين فهمي اللي لما كنا صغيرين كان اللي يشوف حسين فهمي تبقى امه داعياله، كل سنة وأنتوا طيبين كونوا عندكم تسامح هو التسامح جراله ايه".

وأتم حديثه : "الانتقاد بالشكل دا ممكن يوصل بعض الفنانين إنهم يقعدوا في البيت وانتوا مش بتفيدوا حد والفنان على آخر عمره مش بيعرف يتعالج محدش بيعمله حاجه ومحدش بيفيده، بشويش وكله هيبقى عظيم".