أمال ماهر تتصدر التريند بعد انباء اختطافها.. والجمهور يطالبها بالظهور في لايف

تصدرت الفنانة أمال ماهر تريند محرك البحث العالمي جوجل بعد نشرها عدد من الصور أمام البحر حيث تقضي عطلتها الصيفية.

وظهرت آمال ماهرعلى "إنستجرام" بعد شائعات طالتها الفترة الماضية بشأن اختفائها، وغيابها عن صفحات السوشيال لعدة أشهر.

ولكن لم يكتفي جمهورها بهذه الصور فقط وطلبوا منها الظهور في لايف للاطمئنان عليها بعد تداول شائعات خطفها.

الجمهور قلق على آمال ماهر

وكتب أحدهم عبر حسابه على "فيس بوك": اين امال ماهر؟!.. يوم ٢ يونيو ٢٠٢١ اعلنت امال ماهر اعتزالها الفن تماما علي حسابها علي انستجرام رغم انها قبلها عالطول كانت اعلنت عن انتهائها من تسجيل البومها الجديد و اللي كانت متحمسة لنزوله جدا !! بعدها فوجئنا ان تم حذف كل اعمال امال ماهر من عاليوتيوب و حتي البومها الاخير اللي وكان خلص بالفعل لا نزل ولا حد سمع عنه ولا عنها حاجة!! ومات الكلام بعديها عن امال ماهر و اتنست.

وتابع: من كام يوم انتشرت اخبار عن ان مطربة شابة تم سجنها باحد السجون علي الطريق الصحراوي و انها بتتعرض هناك للعنف و الانتهاكات اللي خليتها شبه جثة و بعديها بيوم انتشرت اخبار انها اتنقلت الي مستشفي في حالة غيبوبة بعد كم التعذيب اللي اتعرضتله و ان اللي بيحاول يوصل المعلومات دي للرأي العام هو ظابط من داخل السجن اللي هي فيه لانه مافيش في ايده اي حاجة يقدر يعملها غير انه يحاول يلفت انتباه الاعلام انه يدور علي الموضوع و ينقذ امال ماهر و طبعا معروف ليه الموضوع متكتم عليه كدة لان اللي وراه واحد شيخ معروف صاحب سلطة و مال و نفوذ ماحدش يقدر يقف قدامه!!

وأضاف: النهاردة و بعد ما الخبر ابتدي يسمع ، اكونت امال ماهر نزل عليه لاول مرة من وقت اعتزالها بوست فيه صورتها و هي كاتبة لجمهورها انهم وحشوها و انها في المصيف!! طبعا نزل تكذيبات من الاكونتات اللي متبنية قضية امال ماهر ان مش هي اللي منزلة البوست ده و ان الشيخ المجرم ده مسيطر علي كل حساباتها و هو اللي منزل البوست بصور قديمة علشان ينفي موضوع فضيحته اللي ريحته بدأت تفوح و ابتدت الاكونتات دي تطالب حساب امال ماهر انها تطلع لايف لجمهورها و تأكدلهم انها بخير و ان كل دي اشاعات !! طبعا مافيش اي استجابة من الاكونت و ماطلعتش و مش هتطلع !!.

واستكمل: اين هي امال ماهر؟! ماذا اصابها ؟! الكلام دلوقتي علي انهم بيهيؤ خبر موتها و ماعندناش اي مصدر اعلامي مصري اتكلم عن الموضوع ولا فتح سيرته رغم تبني حسابات سعودية و لبنانية مهمة توصيل الموضوع للاعلام العربي !!.

واختتم: اتكلمو عن امال ماهر يا جماعة يمكن لما الموضوع ينتشر هنا في مصر ده ممكن يكون سبب لانقاذ حياتها لو هي فعلا في خطر علشان ماتحصلش نيرة و سوزان تميم و مليون ست بتتعرض للقتل من اصحاب النفوذ او العقول المريضة!!.