شريف إدريس يعلن اعتزاله الفن: الشغل متقسم على ناس معينة

أعلن الفنان شريف إدريس اعتزاله الفن بشكل نهائي، عبر منشور نشره عبر حساباته على مواقع التواصل الاجتماعي.

وقال شريف إدريس : بسم الله الرحمن الرحيم، بعد 35 سنة سعي وتعب وشقى في الوسط الفني؛ قررت الاعتزال والابتعاد تماما، وتغيير مسار حياتي، وأي حد عنده فرصة سفر ليا هكون شاكر ليه، وده طلبي الوحيد.

وأضاف: ده قرار أخدته بعد ما الأمور وصلت في الوسط الفني لمرحلة عبثية؛ وصلت أني بقيت بشوف بعض الزملاء بيشحتو الشغل علني، علشان يشتغلو لأن الشغل بقى متقسم على ناس معينة، فلو الأمور وصلت لكده أبعد أحسن.

وتابع: حتى لما بيجي شغل، بيتفرض عليك توافق بأقل الفلوس، وتخرج من الشغل مديون، ومواقف مهينة زي أن شركة إنتاج تعرض عليك أجر هو قيمة ربع أجرك، والسبب أن الميزانية مصروفة على الديكور؛ طب خلو الديكور يمثل.

واستطرد : هحكيلكم موقف حصل معايا من أسبوع؛ اتصل بيا حد قالي عايزين حضرتك بكرة، عندك تصوير في مسلسل كذا، بس هتدفع 10% للكاستينج دايريكتور، كان هيجيلي جلطة بعد ما قفلت المكالمة، ووافقت علشان أنا محتاج أشتغل ومحتاج فلوس، وماقدرتش استوعب الفكرة بصراحة، أني بعد العمر ده.. مضطر أدفع علشان أشتغل.. فاتصلت واعتذرت وده الحال حاليا ان الامور بقت في ايد كاستينج دايريكتور..وده موقف من مواقف كتير مريت بيها لو حكيتها محتاجه كتاب مش بوست عالفيس.

واستكمل : "فطالما الشغل بقي لازم يتدفعله..وطالما الشغل بقي بالشحاته..يبقي بلاش احسن، انا طول عمري راضي الحمد لله..بس حقيقي انا وصلت لمرحلة اكتئاب وصلتني اني بقيت بنام احلم بكابوس اني بقتل عيالي وبقتل نفسي لأني وصلت لمرحله نفسيه وماديه اني بقيت مش قادر اربيهم ولا اصرف عليهم وانا عندي تلات اطفال بعبدهم عباده متخيلين حجم المسؤليه..وبقيت مديون لطوب الارض"

وأوضح: "حقيقي لو حد عنده فرصة سفر ليا هاكون شاكر ليه جداً وهيكون جميل في رقبتي لحد ما اموت لأن حقيقي انا مش قادر اعيش في البلد دي تاني انا حاولت اسعي في اي مجال تاني بس ماقدرتش"

وأكد أنه لو اتعرض عليه بطولات بعد المنشورهيرفضها لان المنشور هو نهاية علاقته بالمجال.

واختتم :"ملحوظه:انا مش محتاج طبطبه من حد انا محتاج فرصة سفر وشغل تخليني اعيش ولادي حياة كريمة وشكرا ليكم محبتي للجميع، هاين عليا اقوم ارمي نفسي من البلكونه بعد ماوصلت اني اكتب البوست ده"