حمادة هلال يكشف ”مفاجأة” عن أغنية ”عيش بشوقك” لتامر حسني: كانت بتاعتي

كشف الفنان حمادة هلال، عن مفاجأة بخصوص أغنية "عيش بشوقك" والتي قام بغنائها المطرب تامر حسني.

وخلال حواره ببرنامج "حبر سري" للإعلامية أسما إبراهيم، قال:" أغنية عيش بشوقك دي غنوتي وأول مرة أقول كده أنا قعدت 6 شهور وتعبت فيها والمؤلف والملحن عارفين ده كويس".

وتابع:"انشغلت بمرض أمي الله يرحمها أسبوعين أو تلاتة بعدها رجعت يلا يجماعة نشتغل فجأة لقيت الغنوة راحت في حتة تانية، وكلمتهم قولتلهم يا جماعة دي بتاعتي وحقي ده حرااام .. الفكرة إني عطلتها عشان كنا قاريين فاتحة عشان حد معين هيكون الموزع فاستنيناه لغاية ما لقيتهم اشتغلوا فيها قولتلهم هي الفاتحة بتمشي على الموزع وأنا لأ؟".

وأضاف:"كنت أقدر أزعّل الناس دي كان ممكن أنزل تاني يوم بالأغنية على السوشيال ميديا بس أنا قولت أعمل ليه كده .. مش هنسى الفترة دي أمي الله يرحمها كانت حاسة بيا قولتلها غنوة شقيت عليها وأنا كنت فرحان بيها وبنتي كانت معايا فيها فـ الشيطان قالي انزل بيها ودي بتاعتك وحقك ومجهودك فـ قولت لأ ويارب انت اللي عالم".

واستكمل:"مفيش 15 يوم روحت قابلت أوكا وأورتيجا كنت رايح لمي كساب أسلّم عليها كانت تعبانة فـ قالولي فيه أغنية اسمها أشرب شاي وعملتها وبقت غنوة وإعلان وكسرت الدنيا ".

وأوضح: "أنا مش زعلان على الأغنية بس أنا لو حد قالي دي اغنيتي وشقيان عليها وانشغلت في مرض امي هقولك خدها مش هقولك اخدت تنازل هو احنا بقينا في قانون الورقة والقلم ولا قانون الكلمة والجدعنة".

وعن تواصله مع فريق عمل الأغنية ، قال "أنا كلمت الزميل والمنتج وكلهم وقلتلهم دي بتاعتي وال15 يوم أنا قاعد تحت رجل امي والأغنية أنا شقيان فيها ليه بتعملوا كدة ؟ كان ممكن أزعلهم وأحـرق دمهم بس مرضتش أحـرق دمهم ربنا يحـرق دمي فاستعوضت ربنا وربنا عوضني".

مسلسل المداح الجزء الثاني

وعلى الجانب الأخر، يخوض حمادة هلال، المارثون الرمضاني القادم بمسلسل "المداح 2 - أسطورة الوادي" مع النجوم: هبة مجدي، وكمال أبو رية، ولاء الشريف، وأحمد فؤاد سليم وغيرهم من الفنانين.

أخر أعمال حمادة هلال

ويذكر أن الجزء الأول من مسلسل "المداح" حصد ردود أفعال إيجابية بعد عرضه في موسم رمضان الماضي، الجزء الأول من بطولة حمادة هلال، نسرين طافش، أحمد بدير، خالد سرحان وغيرهم نخبة من النجوم.