بسبب وجبة.. عامل توصيل بمطعم ماكدونالدز يعتدي على طفلة ومدير الفرع يعلق:ملناش دعوة
أثارت واقعة اعتداء أحد عمال التوصيل للمنازل "الديلفيري"بمطعم ماكدونالدز على طفلة شوارع صغيرة بالضرب، غضب جمهور السوشيال ميديا.
تفاصيل واقعة الاعتداء على طفلة أمام ماكدونالدز
وروى أحد رواد مواقع التواصل، تفاصيل الواقعة عبر حسابه "بفيس بوك"، كاتبا :"عزيزي العميل.. يرجى الانتظار لأن جميع مندوبونا مشغولون الآن في ضرب عملاء آخرين".
وتابع:"بعد واقعة ضرب موظف لعميل في أحد فروع فودافون يظهر إن ماكدونالدز قررت متكونش أقل وضاعة منهم..إمبارح واحدة زميلتي كانت في فرع لماكدونالز في العبور.. وطفلة صغيرة بتشحت قصاد المحل.. الطفلة دي كانت جعانة فكانت واقفة قصاد المحل على أمل حد يشتري لها أكل أو يديها فلوس".
وأضاف:" لغاية ما جه بتاع ديلفري مسكها ووقعها على الأرض ونزل فيها ضرب.. ولما زميلتي حاولت تمنعه وتقترح عليه إنها عايزة تشتري وجبة للبنت الصغيرة وإنه يبطل يأذيها مكنش مهتم غير إنه يطرد الطفلة علشان متوقفش تاني قصاد المحل".
وأوضح:"زميلتي دخلت لمدير الفرع قالت له (دي طفلة.. حرام.. أنتم معندكمش رحمة).. فكان رده (ملناش دعوة.. الرحمة دي عند ربنا).
واختتم:"فعلا الرحمة عند ربنا مش عند ناس زيكم مفيش في قلوبهم رحمة ولا قادرين يحسوا بجوع أو برد الطفلة الصغيرة اللي استخسرتم فيها إن واحدة تدفع تمن وجبتها أو حتى تسيبوها في حالها بدل ما تضربوها كأن وجودها قصاد المحلل بيقلل من قيمة العلامة التجارية بتاعتكم.. والسؤال: هية ليه الناس بقيت شريرة ومفترية كدة ؟".
الجمهور يعبر عن غضبه من واقعة الاعتداء على طفلة أمام ماكدونالدز
وبدأ المنشور في الانتشار على الفيس بوك وعلق أحدهم كاتبا:"لا حول ولا قوة إلا بالله.. الإنسانية بقت نادرة والرحمة بنشحتها .. ربنا يبارك في زميلتك ويكتر من أمثالها يارب.. ويرحم من لا حول له ولا قوة"، وكتب أخر:"للأسف الرحمة بقى لها منطق وحسابات محدش قال ادوهم فلوس بس على الاقل لو جوعانين ادوهم لقمه".
واقعة "فودافون"
والجدير بالذكر، أنه منذ أيام انتشر فيديو من داخل أحد فروع شركة فودافون، بتبادل الاشتباكات بالأيدي بين أحد العملاء وموظفين بخدمة عملاء، هو ما أثار غضب متابعي مواقع التواصل الاجتماعي، لتتصدر الواقعة قوائم "الترند" في مصر.
