زينب غريب تروي تفاصيل تعرضها للتحرش من طبيب بيطري
كشفت الفنانة زينب غريب تفاصيل جديدة في واقعة تحرش طبيب بيطري بها عبر فيديو على حسابها الشخصي بـ "إنستجرام".
وقالت زينب غريب عبر الفيديو: "كنت الساعة 9 الصبح ماشية في وسط البلد كنت عند صديقتي وسمعت صوت حد ماشي ورايا في الأول كنت فكره ان حد ماشي في نفس الطريق بس الطريق كان فاضي وبعد شوية بدأت أخاف وقلقت وقبل ماأوصل للعربية ببص ورايا لقيت حد ماسك الموبيل وبيصورني وبيصور جسمي من ورا ".
وتابعت:"طبعا أنا غضبت جدا وروحت ماسكه في التيشرت بتاعه وقولتله لو سمحت وريني الموبيل بتاعك أنت كنت بتصورني،حاول يهرب والناس اتلمت حواليا وساعدتني وبسرعة جدا حد من أفراد الأمن جه وروحنا على القسم ولقينا مصور 3 صور بأحجام مختلفة بنفس الشكل ".
وأضافت غريب: "روحت على النيابة وقدمت أقوالي ،قعدت 8 ساعات واكتشفت أنه طبيب بيطري ومراقب جودة لحوم ،الجملة اللي سمعتها واتجننت (دانت فاكرني جاموسة)،وعرفت كمان أنه متجوز ووالدته طلبت مني تغيير أقوالي والتنازل عن القضية وقالوا لي (ارجوكي متخلهوش يتحبس في أيام مفترجة)".
واستكملت: "التحرش جريمة ،في بنات كتير حصلهم أمورا مُشابهة لواقعتي لكن خايفين من الكلام ،وده مش أول موقف تحرش أمر بيه ،وأنا عندي 12 سنه تم التحرش بيا ".
يذكر أن زينب غريب ظهرت لأول مرة على شاشات التلفزيون من خلال مسلسل "بـ100 وش"، والذي عرض في الموسم الرمضاني 2020، بطولة الفنان آسر ياسين، والفنانة نيللي كريم، وعدد من الفنانين بينهم مصطفى درويش، إسلام إبراهيم، وعلا رشدي، من إخراج كاملة أبوذكري.
