رامي رضوان عن وضع دلال عبد العزيز: الحالة صعبة وارجوكم تستمروا في الدعاء
بعد غياب لأيام منذ وفاة الفنان سمير غانم ، عاد الإعلامي رامي رضوان، إلى شاشة التلفزيوني ليكشف عن تطورات حالة دلال عبد العزيز و يرد على الأخبار المغلوطة التي تكتب.
وقال "رامي"، خلال برنامجه "مساء DMC"،: "كم حنية وحب ودفئ وتواضع مدرسة حماتي العزيزة، وفى المرض دايما بتفكر مين دلوقتى محتاج لازم نقف جنبه وبتفكر فى الناس، وحماتي تقف جنب أى حد سواء في الفرح أو الحزن، ويشاء القدر إنها متكنش موجودة في تلقي عزاء زوجها الحبيب سمير غانم".
وأضاف: "بعض الناس قالت الفترة اللي فاتت ومن ضمن المعلومات الغلط اللي انتشرت إنها حضرت الجنازة وتأثرت والأكسجين نزل، هي لم تحضر الجنازة، للأسف ظروفها الصحية الصعبة اضطرتنا إننا نخبي عنها لحد دلوقتي نخبي عنها لدرجة إننا بنمثل".
وتابع: "هي مازالت في الرعاية المركزة، فصلنا التليفزيون في المستشفى وبدأنا نجيب حاجات مسجلة لأن الخبر كان بيتذاع في كل حتة، تليفوناتها سحبينها من اليوم الأول وقد إيه لحظة ضغط، لما حصلت حالة الوفاة بدأنا نفكر إيه السيناريو اللي هيتقال اللي يخلينا نغيب تمامًا أثناء فترة تواجدنا وربنا الهمنا بسيناريو، والحمد لله لحد النهاردة هى متعرفش، بس القلب بيحس واحساسنا الشخصي بيقول أنها حاسة ما هو رفيق الدرب في توافق في الأرواح الاحساس موجود ولكن لم يؤكد، محدش فينا لابس أسود وبندعي الابتسامات قدامها عشان متعرفش حاجة".
وكشف عن حالتها الصحية قائلا: "أجريت مسحة مرتين والنتيجة سلبية لكورونا لكن لم يحدث تعافى بشكل كامل وهي حاليا في مرحلة أعراض ما بعد كورونا، وهي أعراض شديدة ومرحلة صعبة وشديدة يمكن تكون أشد من كوفيد نفسه، وملهاش علاج معين، وبندعى الله تعالى بتمام شفائها.. لكن الحالة صعبة وارجوكم تستمروا في الدعاء ليها بكل ما اسعدوكم".
ويذكر أن الفنان سمير غانم رحل عن عالمنا يوم الخميس الماضي 20 مايو2021، وأقيمت جنازته عقب صلاة الجمعة 21 مايو من مسجد المشير بالتجمع الخامس وحضر عدد كبير من الفنانين.
